QR IIDM Azamattyq aviatsiia komitetiniń tóraǵasy Talǵat Lastaev «Diamond Princess» lainerinde bolǵan qazaqstandyqtar nelikten elge ortaq bortpen ushyp kelgenin túsindirdi, dep habarlaidy QazAqparat.
«Bul - SCAT áýe kompaniiasy oryndaityn Nur-Sultan men Tokio arasyndaǵy turaqty jolaýshylar reisi bolatyn. «Diamond Princess» lainerinde bolǵan jolaýshylar jalpyǵa ortaq tártip boiynsha turaqty reiske bilet alǵan. Tasymaldaýshy retinde áýe kompaniiasy ol jolaýshylardyń dál osy reiske otyrǵanynan habarsyz boldy. Iaǵni olar kez kelgen basqa reispen-aq elge ushyp kele alatyn edi», - dedi Talǵat Lastaev Úkimet otyrysynan keiin tilshilerge.
Komitet tóraǵasy SCAT áýe kompaniiasy shynynda da óz jolaýshylarynyń ishinde «Diamond Princess» lainerindegi qazaqstandyqtar bar ekenin bilmegenin shegelei tústi.
«Tiisinshe reisten keiin karantin kerektigi jóninde áýe kompaniiasynyń qyzmetkerlerine ushar aldynda habarlandy. Japondyq tarap bolsa bul jolaýshylardy óz elindegi karantinnen, iaǵni testiden keiin jibergen. Olar biletti jalpyǵa ortaq tártippen aldy. Olar – Qazaqstan Respýblikasynyń azamattary. Áýe kompaniiasynyń olardy tasymaldaýdan bas tartýǵa qaqysy joq», - dedi komitet tóraǵasy.
Eske sala ketsek, japondyq Diamond Princess laineriniń bortynda bolǵan Qazaqstannyń 4 azamaty Nur-Sultan qalasynyń №3 kópbeiindi aýrýhanasynyń janyndaǵy infektsiiaǵa qarsy korpýsqa ornalastyrylǵan edi. 23 aqpanda Nur-Sultan qalasyndaǵy áýejaiǵa Tokio-Nur-Sultan reisimen 20 jolaýshy kelgen. Onyń 16-sy – Qazaqstan azamaty. Tórteýi - Diamond Princess laineriniń ishinde bolǵan jolaýshylar.
