Foto: Coral Expeditions
Avstraliianyń Úlken tosqaýyl rifi aýmaǵyndaǵy Lizard aralynda 26 qazanda 80 jastaǵy áieldiń máiiti tabyldy, dep habarlaidy Ult.kz CNN agenttigine silteme jasap.
Aldyn ala málimet boiynsha, qaitys bolǵan áiel Coral Adventurer atty krýiz kemesiniń jolaýshysy bolǵan. Keme bir kún buryn osy araldyń mańynda aialdap, 60 kúnge josparlanǵan sapar aiasynda týristerge sý astyndaǵy súńgý (snorkling) men jaiaý serýen uiymdastyrǵan. Sapardyń baǵasy shamamen 45 myń eýro (50 myń AQSh dollary) bolǵan.
Jaiaý serýen kezinde 80 jastaǵy jolaýshy araldyń eń biik tusyna kóterile almai, ne artqa qaitpaq bolǵan, ne tynyǵyp qalýdy jón kórgen. Ol jalǵyz júrgendikten, kemeniń qyzmetkerleri onyń joq ekenin birden baiqamaǵan. Keme kún batqanda jolǵa shyǵyp ketken, al áieldiń joǵalǵany ekipaj keshki as kezinde ǵana anyqtaǵan.
Keme dereý aralǵa qaita oralyp, izdestirý-qutqarý jumystaryn bastaǵan. Operatsiiaǵa tikushaq ta tartylǵan. Áieldiń denesi keiinirek araldaǵy jaiaý jol mańynan tabyldy.
Politsiia ólimdi «kenetten bolǵan jáne kúmán týǵyzbaityn jaǵdai» dep sipattady. Alaida Avstraliianyń Teńiz qaýipsizdigi basqarmasy (AMSA) bul qaiǵyly oqiǵa boiynsha tergeý bastady. Tergeýshiler kemeniń ne sebepti jolaýshyny qaldyryp ketkenin, izdeý nege uzaqqa sozylǵanyn jáne áieldi aman alyp qalýǵa múmkindik bolǵan-bolmaǵanyn anyqtamaq.
Krýiz kemesi izdeý jumystaryna bailanysty kidirgenimen, keiin saparyn jalǵastyrǵan. Ekipaj múshelerinen jaýap alý 2 qarashada, keme Darvin qalasyna jetken soń ótedi.
Coral Expeditions kompaniiasynyń bas direktory Mark Faifild marqumnyń otbasyna kóńil aityp, kómek kórsetiletinin málimdedi.
The Independent basylymynyń málimetinshe, kemede dáriger de, medbike de bolmaǵan.
Kompaniianyń resmi saitynda Coral Adventurer kemesiniń syiymdylyǵy 120 jolaýshy men 46 ekipaj múshesine arnalǵany, ári onyń alys teńiz aimaqtaryna saiahat jasaýǵa beiimdelip salynǵany jazylǵan.
Coral Expeditions kompaniiasy Kerns qalasynda ornalasqan jáne 40 jyldan beri Avstraliia men ózge baǵyttar boiynsha teńiz saparlaryn uiymdastyryp keledi.
Bul oqiǵa Úlken tosqaýyl rifindegi jolaýshylar qaýipsizdigi standarttaryna qatysty pikirtalas týǵyzdy. AMSA erejelerine sáikes, árbir jolaýshy kemege mingen soń mindetti túrde tirkelip, sanaý rásimi júrgizilýi tiis.
