QR Parlamenti Senatynda «Qazaqstan Respýblikasynyń keibir zańnamalyq aktilerine jumyldyrý daiyndyǵy jáne jumyldyrý máseleleri boiynsha ózgerister men tolyqtyrýlar engizý týraly» QR Zańynyń jobasy qabyldandy, dep habarlaidy "Ult aqparat".
«Ýákiletti organǵa jumyldyrý daiyndyǵy men jumyldyrý salasyndaǵy memlekettik baqylaý quzyretin berý kózdeledi. Jumyldyrý daiyndyǵy salasyndaǵy buzýshylyqtar úshin ákimshilik jáne qylmystyq jaýapkershilik qoldanatyn jaǵdailar anyqtalady. Keibir memlekettik organdardyń fýnktsiialary naqtylanady», - dedi dedi QR Ulttyq ekonomika ministri Rýslan Dálenov Senattyń plenarlyq otyrysynda.
Odan bólek, jumyldyrý daiyndyǵy salasyndaǵy ýákiletti organǵa saqtandyrý qoryn qurý jáne saqtaý salasyndaǵy qyzmetti úilestirý quzyreti beriledi.
«Bul – qarý-jaraq pen áskeri tehnika buiymdaryna, asa mańyzdy azamattyq ónimge tehnikalyq qujattamanyń, sondai-aq qaýiptiligi joǵary nysandarǵa, halyqtyń tynys-tirshiligin qamtamasyz etý júielerine jáne ulttyq igilik bolyp sanalatyn nysandarǵa jobalyq qujattamanyń saqtandyrý qory», - dep túsindirdi ministr.
Memlekettik materialdyq rezervti jetildirý boiynsha jańa tásilder engizilýde:
- Densaýlyq saqtaý ministrliginiń vedomstvolyq baǵynysty uiymy (Ulttyq ekspertiza ortalyǵy) memlekettik materialdyq rezervke jetkizý kezinde jáne olardy saqtaý kezeńinde taýarlardyń sapasyn baqylaýdy júzege asyrady;
- memlekettik materialdyq rezerv taýarlaryn kádege jaratý boiynsha quzyreti engiziledi;
- materialdyq qundylyqtardy jańartýdy saqtaý pýnktterin júzege asyrady;
- materialdyq qundylyqtar basqa memlekettik organdardyń balansyna tegin beriledi;
- jumyldyrý rezerviniń meditsinalyq maqsattaǵy dárilik zattary men buiymdaryn jetkizý, saqtaý jáne jańartý fýnktsiialary densaýlyq saqtaý salasyndaǵy ýákiletti organnyń jáne tegin meditsinalyq kómektiń kepildik berilgen kóleminde qyzmet etetin biryńǵai distribiýtorǵa oryndalýy júkteledi.
