Búgin Parlament Senatynyń jalpy otyrysynda QR Joǵarǵy sotynyń sýdialaryn sailaý jáne qyzmetinen bosatý máselesi qaraldy, dep habarlaidy "Ult aqparat".
Atap aitqanda, Sáken Abdollany jáne Mádeniet Jaqanqyzy Omarbekovany Joǵarǵy sottyń sýdialary qyzmetterine sailaý, sondai-aq Gaharman Bazarbekuly Dúisenbaevty ornynan túsýine bailanysty Joǵarǵy sottyń sýdiasy qyzmetinen bosatý usynymy engizildi. Talqylaý barysynda palata depýtattary osy usynymdarǵa qoldaý bildirdi.
Abdolla Sáken, 1964 jyly týǵan, joǵary zań bilimi bar. Zań ǵylymdarynyń kandidaty. Zańger mamandyǵy boiynsha óziniń eńbek jolyn 1986 jyly Ońtústik Qazaqstan oblysynyń prokýratýra organdarynda bastady. 1992 jyldan bastap Ońtústik Qazaqstan oblysy Ádilet basqarmasy bastyǵynyń orynbasary bolyp jumys istedi. 1993 jyly Ońtústik Qazaqstan oblystyq sotynyń sýdiasy bolyp sailandy. 1996 - 1999 jyldary Ońtústik Qazaqstan oblysy Ádilet basqarmasynyń bastyǵy boldy.
1999 - 2002 jyldary Almaty qalasy Ádilet basqarmasynyń bastyǵy. 2002 - 2003 jyldary Qazaqstan Respýblikasy Ádilet ministrligi Sot saraptamasy ortalyǵynyń direktory bolyp jumys istedi. 2003 jyly Joǵarǵy sot Apparatynyń basshysy bolyp taǵaiyndaldy. 2004 jyldan bastap Joǵarǵy sot sýdiasy. 2007 jyldan bastap Mańǵystaý oblystyq sotynyń tóraǵasy. 2011 jyldan bastap Nur-Sultan qalasy sotynyń tóraǵasy. 2013 jyly Qazaqstan Respýblikasy Áskeri sotynyń tóraǵasy bolyp taǵaiyndalǵan. 2018 jylǵy jeltoqsannan bastap qazirgi ýaqytqa deiin Aqtóbe oblystyq sotynyń tóraǵasy. Sýdialyq jumys ótili 19 jyl.
Omarbekova Mádeniet Jaqanqyzy 1965 jyly týǵan, joǵary zań bilimi bar. Zań ǵylymdarynyń kandidaty. Zańger mamandyǵy boiynsha óziniń eńbek jolyn 1988 jyly Qaraǵandy qalasy Sovet aýdandyq sotynyń sot otyrysynyń hatshysy bolyp bastady. 1990 jyldan bastap Qaraǵandy qalasy Sovet aýdandyq sotynyń sot oryndaýshysy bolyp jumys istedi. 1992 jyldan bastap Qaraǵandy qalasy Sovet aýdandyq soty tóraǵasynyń kómekshisi. 1993 jyly Qaraǵandy qalasy Sovet aýdandyq sotynyń sýdiasy bolyp sailandy. 2000 jyldan bastap Qaraǵandy oblystyq sotynyń sýdiasy. 2015 jylǵy mamyrdan bastap qazirgi ýaqytqa deiin Nur-Sultan qalasy sotynyń sýdiasy. Sýdialyq jumys ótili 27 jyl.
