Qazaqstan Ulttyq Olimpiada komiteti men IýNESKO yntymaqtastyq týraly kelisim jasasty, dep habarlaidy "Ult aqparat".
Qujatqa QR UOK bas hatshysy Sáken Musaibekov jáne IýNESKO-nyń Qazaqstan, Qyrǵyzstan jáne Tájikstan boiynsha klasterli biýrosynyń direktory Krista Pikkat qol qoidy.
QR UOK-dan málim etkendei, memorandým - Ortalyq Aziiada qabyldanǵan alǵashqy qujat.
Memorandým aiasynda dopingpen kúres kezinde kúsh biriktirip, dene tárbiesi men sportty nasihattaýǵa mán berilmek. Odan bólek, qazaqstandyqtar arasynda olimpiadalyq qozǵalysty damytýǵa, jalpyǵa ortaq jáne teńdei sportty qoldaýǵa erekshe kóńil bólinedi. Sondai-aq, kópshilikke arnalǵan sport, bilim jáne genderlik teńdik jónindegi birlesken jumystardyń negizgi baǵyttary da belgili boldy.
«Taza sportshylardy qorǵap, dopingpen kúresý álemdik Olimpiada qozǵalysynyń, onyń ishinde Qazaqstannyń da basty múddeleriniń biri. Olimpiada hartiiasy, Búkilálemdik dopingke qarsy kodeks pen Sporttaǵy dopingpen kúresý jónindegi halyqaralyq konventsiia dopingpen kúres jolyndaǵy basty qujattar sanalady. Aita ketelik, Beijiń Olimpiadasy IýNESKO aiasyndaǵy Dopingpen kúres jónindegi halyqaralyq konventsiia kúshine engen soń ótkizildi. Qazaqstan bul qujatty 2009 jyly ratifikatsiialady», - delingen habarlamada.
Sáken Musaibekovtiń aitýynsha, QR UOK halyqaralyq uiymdarmen qarym-qatynasty nyǵaitýǵa úlken kóńil bóledi.
«Onyń ústine, Halyqaralyq Olimpiada komiteti men IýNESKO qarym-qatynasynyń kirpishi baiaǵyda qalanǵan. Kóptegen salalarda bir-birine qoldaý kórsetedi. Biz óz elimizdegi áriptestikti damytyp, kórsetilgen baǵyttar boiynsha belsendi túrde qyzmet etýge daiynbyz. Búginnen bastap resmi túrde áriptes atandyq. Bul qadam bizdiń birlesken jumysymyzǵa jańa serpin berip, ortaq maqsatqa jetý jolynda kómekteseri sózsiz», - dedi ol.
Krista Pikkattyń atap ótýinshe, IýNESKO úshin sport jai ǵana jarys nemese dene tárbiesi emes. Sport - tolerantty, ádiletti jáne beibit qoǵam qalyptastyrýdaǵy negizgi quraldardyń biri. Ol adamdardy jynysy men senimine, násiline qaramastan biriktiredi.
«Aramyzdaǵy áriptestik sportty damytýǵa jańa kúsh berip, Qazaqstandaǵy olimpiadalyq qozǵalysty nasihattai túseri anyq», - dedi ol.
Aita keteiik, búginge deiin QR UOK men IýNESKO-nyń birneshe birlesken jobasy iske asyryldy.
Sonyń biri - ótken jyldyń aiaǵynda uiymdastyrylǵan «Girls Power"»Women Athletes' Career Transition Program» birlesken seminar-treningi. Baǵdarlama sportshy qyzdar men sporttyq mansabyn aiaqtaǵan nemese aiaqtaýǵa jaqyn jandardyń ózge de áleýmettik salalarǵa aýysýyna baǵyttalǵan. Qazaqstanda alǵash ret ótkizilgen joba atletter tarapynan úlken qyzyǵýshylyq týdyrǵandyqtan, bolashaqta da jalǵasyn tabary sózsiz. Eske salaiyq, qazaqtyń ulttyq oiyny «Asyq atý», «Qazaq kúresi», sondai-aq suńqarmen ań aýlaý saiatshylyq óneri IýNESKO-nyń materialdyq emes mádeni muralary tizimine engen.
