Qazaqstan Ulttyq bankiniń ókilderi birqatar bankterdiń jai-kúii týraly dáieksiz aqparatty taratýǵa qatysty málimdeme jasady, dep habarlaidy "Ult aqparat" banktiń baspasóz qyzmetine silteme jasap.
Qazirgi ýaqytta 2017 jylǵy bank qyzmetiniń qorytyndylary boiynsha Qazaqstan Ulttyq bankiniń esebine silteme jasai otyryp, WhatsApp paidalanýshylary arasynda birqatar Qazaqstandyq bankterdiń turaqsyz jai-kúii týraly resmi túrde rastalmaǵan habarlar taratylýda.
Qazaqstan Respýblikasynyń Ulttyq banki búkil jaýapkershilikpen mundai aqparattyń Ulttyq banktiń jyldyq esebinde de, qarjylyq turaqtylyq týraly esebinde de, basqa da eshqandai qujatta joq ekendigin jáne taratylyp jatqan aqparattyń dáieksiz ekendigin málimdeidi.
Ulttyq banktiń esebinde Ulttyq banktiń óziniń qyzmeti týraly aqparat qamtylǵan. Onda Ulttyq bank jáne qarjy júiesi jumys isteitin makroekonomikalyq jaǵdailar, sondai-aq Ulttyq banktiń aqsha-kredit saiasaty, qarjy naryǵyn retteý men qadaǵalaý, qarjy sektorynyń jáne onyń jekelegen segmentteriniń turaqty jumys isteýin qamtamasyz etý salasyndaǵy jáne basqa baǵyttar boiynsha zańnamalyq turǵydan belgilengen maqsattary men mindetterine qol jetkizý boiynsha qabyldanǵan sharalar jariia etiledi.
Ulttyq bank, qarjy naryǵyndaǵy retteýshi bola otyryp, jekelegen bankterdegi nemese basqa qarjy institýttaryndaǵy qarjylyq jaǵdai týraly aqparatty taratpaidy. Qarjy institýttarynyń jai-kúiin baǵalaý qadaǵalaý praktikasynyń sheńberinde júrgiziledi. Onyń nátijeleri boiynsha qajetti túzetý sharalary qabyldanady. Ulttyq bank qoǵamdastyqqa qarjy institýttary jol bergen buzýshylyqtar týraly, qarjy naryǵyndaǵy qyzmet túrlerin júzege asyrýǵa arnalǵan litsenziiany berý, toqtata turý jáne aiyrý týraly ýaqtyly habardar etedi.
Qazirgi ýaqytta naryqty ornyqty qarjy institýttarymen qamtamasyz etýge arnalǵan bank sektorynyń qarjylyq ornyqtylyǵyn arttyrý baǵdarlamasy iske asyryldy. Búgingi kúni bank sektoryn qalypqa keltirý jáne bankterdiń ekonomikany kreditteýi úshin makroekonomikalyq jaǵdailar jasaý sheńberinde qabyldanǵan sharalardyń belgili bir nátijeleri baiqalyp otyr.
Ulttyq bank dáieksiz aqparatty taratýshylardy anyqtaý maqsatynda quqyq qorǵaý organdaryna júgindi.
