Aýyl sharýashylyǵy jerlerin QR azamattaryna jalǵa berý ashyq júrgiziledi jáne barynsha baqylaýda bolady. Bul týraly QR-nyń zańnamalyq aktilerine jer qatynastaryn retteý máseleleri boiynsha ózgerister men tolyqtyrýlar qarastyrylǵan QR Úkimeti otyrysynda málim boldy, - dep habarlaidy "Ult aqparat".
QR aýyl sharýashylyǵy vitse-ministri E. Nysanbaev 2015 jylǵy qarashada qabyldanǵan Jer kodeksiniń normalary boiynsha týyndaǵan qoǵamdyq rezonansqa bailanysty Jer reformasy jónindegi komissiianyń qurylǵanyn eske saldy. Komissiia elimizdiń óńirlerinde birqatar otyrystar ótkizdi. Sonymen birge, halyqty jer zańnamasynyń normalaryn túsindirýmen keńinen qamtý jáne usynystar jinaý maqsatynda 16 Call-ortalyq jáne «jerturaly.kz» saity quryldy, oǵan jalpy 15 987 joldanym kelip tústi.
Usynystardyń negizinde Komissiia Tujyrymdama men «Qazaqstan Respýblikasynyń keibir zańnamalyq aktilerine jer qatynastaryn retteý máseleleri boiynsha ózgerister men tolyqtyrýlar engizý týraly» Zań jobasyn ázirledi.
Barynsha ashyqtyq pen keńinen talqylaýdy qamtamasyz etý úshin Zań jobasy men onyń Tujyrymdamasy ashyq normativtik quqyqtyq aktiler portalynda, AShM resmi saitynda, 12 buqaralyq aqparat quraldarynda jariialandy. Budan ózge, ministrlik janyndaǵy Qoǵamdyq keńes otyrystarynda talqylaýlar jáne qoǵamnyń qatysýymen kópshilik talqylaýlar ótkizildi.
Osylaisha, qazaqstandyqtarǵa aýyl sharýashylyǵy jerlerin jalǵa berý institýtyn saqtai otyryp, Zań jobasymen aýyl sharýashylyǵy jerlerin konkýrstyq negizde berýdiń jeke tártibin ornatý qarastyrylǵan. Kórsetilgen tártipke sáikes, jerdi berý ákimdikpen bekitilgen konkýrsqa shyǵarylatyn jerlerdiń tizimi boiynsha júzege asyrylady.
Ony ótkizýdiń ashyqtyǵy úshin konkýrstyq komissiianyń quramyna qoǵamdyq keńester men uiymdardyń ókilderi engiziledi.
Budan ózge, jariialylyqty jáne onyń barlyq áleýetti qatysýshylarynyń konkýrsqa teń qoljetimdiligin qamtamasyz etý maqsatynda jańa tártip BAQ-ta jáne ákimdik pen AShM-niń resmi internet-resýrstarynda konkýrs ótkizý týraly keńinen habarlaýdy qarastyrady.
Konkýrsqa qatysý úshin qatysýshynyń konkýrsqa qatysý usynysyn berýi mindetti shart bolyp tabylatynyn aita ketken jón. Onda aýyl sharýashylyǵy óndirisin júrgizýdiń biznes jospary, sharýashylyq ishindegi jer qurylymy jobasyn qurý jáne igerý boiynsha, jergilikti turǵyndar úshin jumys oryndaryn qurý boiynsha, indikativti kórsetkishterdi oryndaý boiynsha mindettemeleri qamtylýy tiis.
Atalǵan talaptar beriletin jerlerdiń tiimdi ári utymdy paidalanylýy maqsatynda qoiylady.
Beriletin aýyl sharýashylyǵy jerleriniń utymdy paidalanylýyna baqylaýdy kúsheitý maqsatynda zań jobasynda turaqty monitoring júrgizý qarastyrylǵan: jalǵa alǵan alǵashqy 5 jylda jyl saiyn, odan keiingi jyldary sýarylatyn shabyndyqtarda ár 3 jyl saiyn, qoldan sýarylmaǵan jerlerde - ár 5 jyl saiyn.
Aýyl sharýashylyǵy jerleriniń úlken aýqymynyń «bir qolǵa» berilýine jol bermeý maqsatynda aýyl sharýashylyǵy maqsatyndaǵy jer telimderiniń maksimaldy kólemin belgileý qarastyrylǵan. Olardy qazaqstandyqtar ár oblystyń ákimshilik aýdandary (qalalary) aýmaǵynda jalǵa alǵan bolýy múmkin.
Sonymen qatar, shekara syzyǵy men shekara mańy aimaǵynda ornalasqan jer telimderin sheteldikterge, azamattyǵy joq azamattarǵa t.b. berýge tyiym salý qarastyrylǵan.
Jeke qoldardaǵy maldy baǵý úshin jaiylymdyq jerlerdiń jetispeýshiligine qatysty máseleni sheshý úshin eldi mekenderdiń mańynda turǵyndardyń olardyń jeke qolyndaǵy maldy ustaý boiynsha qajettilikterin qanaǵattandyrý úshin jaiylymdar aýmaǵy aiqyndalatyn normalar qarastyrylǵan.
.jpeg)