QR Premer-Ministri Asqar Maminniń tóraǵalyǵymen ótken Úkimet otyrysynda «Aýyl – El besigi» jobasyn iske asyrýdyń tásilderi maquldandy.
Elbasy «Qazaqstandyqtardyń ál-aýqatynyń ósýi: tabys pen turmys sapasyn arttyrý» Joldaýynda «Aýyl – El besigi» jobasyn júzege asyrý arqyly aýyldardyń áleýmettik infraqurylymyn jańǵyrtý mindetin qoidy.
Perspektivalyq aýyldardy anyqtaý boiynsha atqarylyp jatqan jumystar týraly QR Premer-Ministriniń orynbasary J. Qasymbek baiandady. Joba aýyldaǵy turmys jaǵdaiyn jaqsartýǵa, aýyl aýmaqtarynyń áleýmettik ortasyn jańǵyrtýǵa, olardy óńirlik standarttarǵa deiin jetkizýge baǵyttalǵan.
2019 jyly oblystardyń ákimdikteri 454 is-shara ótkizý josparlanǵan aýdan ortalyqtary qatarynan 52 aýyldyq eldi mekendi iriktep aldy. Tańdap alynǵan aýyldardyń perspektivalary, jobalardy iske asyrý belgileri men josparlary týraly Almaty oblysynyń ákimi A. Batalov, Qostanai oblysynyń ákimi A. Muhambetov baiandady, bul óńirlerde jobalardy jergilikti biýdjetten birlesip qarjylandyrýdyń joǵary kórsetkishteri belgilengen. Jobany odan ári iske asyrý máseleleri boiynsha «Nur Otan» partiiasynyń hatshysy F. Qýanǵanov, QR eńbek jáne halyqty áleýmettik qorǵaý ministri B. Saparbaev usynystaryn jetkizdi.
QR Úkimetiniń basshysy baiandamalardy tyńdaǵannan keiin, 2025 jylǵa deiin «Aýyl – El besigi» jobasymen 6,1 mln turǵyny bar 2 myńǵa jýyq eldi meken nemese barlyq aýyl turǵyndarynyń 80% qamtylatynyn atap ótti. Aýyldyq eldi mekenderdi jańǵyrtý maqsatynda áleýmettik jáne injenerlik infraqurylymmen qamtamasyz etýdi kózdeitin óńirlik standarttar ázirlengen.
«Kishi ýrbanizatsiia – aýyldardy jańǵyrtýǵa jáne turǵyndardyń turmys sapasyn arttyrýǵa múmkindik jasaidy», — dep Asqar Mamin, jobany iske asyrýdyń maquldanǵan tásilderin tiimdi oryndaýdy, jobany ýaqytyly qarjylandyrý úshin tiisti normativtik aktilerdi pysyqtaýdy tapsyrdy.
«Ákimdikter «Aýyl – El besigi» jobasyn jergilikti biýdjetten birlesip qarjylandyrýdy 20% deiin arttyrý múmkindigin qaraýy tiis, sonymen qatar, biznestiń áleýmettik jaýapkershiligi aiasynda aýyl infraqurylymyn jańǵyrtýǵa qarajat tartý máselesin iri kásiporyndarmen birlesip pysyqtap, týǵan aýyldaryn kórkeitý boiynsha metsenattarmen jumys júrgizý qajet. Budan ózge, árbir óńirge «Jol kartasyn» jasaý tapsyryldy, onda iske asyrý merzimderi men jaýapty adamdar naqty kórsetilýi kerek.
Áleýmettik infraqurylym obektilerin – mektepter, balabaqshalar, densaýlyq saqtaý oryndaryn jóndeý, eldi mekenderdiń ishindegi joldardy jóndeý jumystaryn osy jyldyń qyrkúiegine deiin aiaqtaý qajet», — dedi QR Premer-Ministri Asqar Mamin.
