«QR keibir zańnamalyq aktilerine biýdjet zańnamasyn jetildirý máseleleri boiynsha ózgerister men tolyqtyrýlar engizý týraly» QR Zań jobasynda biýdjet zańnamasyna 6 negizgi baǵyt boiynsha túzetýler usynyldy. Bul týraly QR Premer-Ministri Baqytjan Saǵyntaevtyń tóraǵalyǵymen ótken Úkimet otyrysynda zań jobasyn tanystyrǵan ulttyq ekonomika ministri Timýr Súleimenov baiandady, - dep habarlaidy "Ult aqparat".
Ministr aityp ótkendei, «QR keibir zańnamalyq aktilerine biýdjet zańnamasyn jetildirý máseleleri boiynsha ózgerister men tolyqtyrýlar engizý týraly» Zań jobasy Memleket basshysynyń 2017 jylǵy 31 qańtardaǵy Qazaqstan halqyna Joldaýynda bergen tapsyrmalaryn, Ulttyq qordy qurý jáne paidalanýdyń jańa Tujyrymdamasyn, sondai-aq Parlament jáne Esep komitetiniń usynymdaryn iske asyrý maqsatynda ázirlengen.
Zań jobasymen biýdjet zańnamasyna 6 negizgi baǵyt boiynsha túzetýler usynylýda. Bul ortalyq jáne jergilikti deńgeilerdegi 1,5 myńnan astam qujatty qysqartýǵa múmkindik beredi.
Biýdjettik baǵdarlamalardy iske asyrý kezinde ákimshiniń derbestigin keńeitý aiasynda biýdjetti naqtylaýsyz biýdjettik jobalar arasynda qarajatty qaita bólý múmkindigin qarastyrý usynyldy.
MJÁ jobalaryn jobalaý rásimderin jeńildetý maqsatynda barlyq úderisti 5-ten 3 kezeńge deiin qysqartý usynyldy. Bul MJÁ jobalaryn ázirleý merzimderin 7 aidan 3 aiǵa deiin qysqartýǵa múmkindik beredi. Jańashyldyqtardyń biri «baǵdarlamalyq MJÁ» engizý bolyp otyr – jeke seriktesti irikteý men jobalardy iske asyrýdyń barlyq rásimderi qosymsha saraptama júrgizýsiz memlekettik jáne úkimettik baǵdarlamalardaǵy ár sala úshin jeńildetilgen formada jazylady.
«Sondai-aq, biýdjet úderisin jetildirýdiń basqa da máseleleri qaraldy. Jalpy usynylǵan túzetýler biýdjet qarajatyn ekonomikaǵa jyldamyraq jetkizýge, igerilmeý somasyn azaitýǵa, MJÁ jobalarynyń sanyn arttyrýǵa, sondai-aq úlken derbestik jaǵdaiynda memlekettik organdardyń úlken jaýapkershiligine septigin tigizedi», – dep túiindedi T. Súleimenov.
