QR SIM joǵary deńgeidegi koreiaralyq kelissózderge qatysty málimdeme jasady, - dep habarlaidy "Ult aqparat" ministrliktiń saityna silteme jasap.
"Qazaqstan Respýblikasy 2018 jyldyń 9 qańtarda ótken Koreia Respýblikasy men Koreia Halyq Demokratiialyq Respýblikasy arasyndaǵy joǵary deńgeidegi kelissózderdi quptaidy jáne ekijaqty qarym-qatynastardy jaqsartý úshin eki eldiń kúsh-jigerin joǵary baǵalaidy", - delingen málimdemede.
Sondai-aq, SIM ókilderi bul kezdesý men Soltústik Koreianyń Phenchhanda ótetin XXIII Qysqy Olimpiada oiyndaryna qatysýy tolyqqandy koreiaralyq dialogtyń qaita jańarýyna bastaý bolyp, Korei túbegindegi shielenisti jeńildetýge járdemdesedi dep úmittenetinin aitady.
"Koreia Respýblikasy men Soltústik Koreia arasyndaǵy belsendi dialog Korei túbeginiń denýklearizatsiia máselesine oń áserin tigizetin bolady degen senimdemiz. Qazaqstan Korei túbegindegi jaǵdaidyń dialog pen kelissózder arqyly rettelýin dáiekti qoldaidy", - delingen málimdemede.
Sondai-aq, BUU Qaýipsizdik Keńesiniń tóraǵasy, óz erkimen iadrolyq qarýdan bas tartqan memleket retinde Qazaqstan barlyq múddeli tarapty Soltústik Koreianyń iadrolyq jáne ballistikalyq baǵdarlamalary boiynsha kelissózder úderisin jedel qaita qozǵaýǵa shaqyrdy.
Eske salaiyq, KHDR men Ońtústik Koreia qarym-qatynasty jaqsartý men sportshylarynyń Phenchhandaǵy Olimpiadaǵa qatysý múmkindigin talqylaýdy bastaǵan edi.
Eki taraptyń delegatsiiasy Koreia Respýblikasynyń ulttyq birigý isteri jónindegi ministr Cho Mion Giýnniń basshylyǵymen jáne Komitet tóraǵasy Li Son Gvomen kezdesti. Kelissózder demilitarizatsiialanǵan aýmaqtaǵy Phanmýndjom kelissózder pýnktindegi "Beibitshilik" úii atty ǵimaratta ótti. Aita keteiik, kelissózder jabyq tártipte ótip jatyr, iaǵni jýrnalister qatysyp jatqan joq.
KHDR basshysy Kim Chen Yn 1 qańtardaǵy joldaýynda Phenchhandaǵy Olimpiadaǵa sáttilik tilep, oǵan Soltústik Koreia sportshylarynyń qatysýyna úmit bildirgen. Osyǵan qatysty Ońtústik Koreia kelissóz ótkizýdi usynǵan bolatyn.
Osyǵan deiin KHDR-dyń Ońtústik Koreiamen kelissózder ótkizýge keliskeni habarlasqan bolatyn. Bul týraly Korei Respýblikasynyń ulttyq birigý isteri ministrligi málimdegen edi.
Aita keteiik, sońǵy ret KHDR men Korei Respýblikasy arasyndaǵy kelissóz 2015 jyly jeltoqsanda ótken bolatyn.
