Túrkistan oblysynyń eldi mekenderin sý basýǵa qatysty ózbek tarapyna QR Syrtqy ister ministrliginiń notasyn joldaý máselesi qarastyrylmaidy. Bul týraly QR SIM-niń resmi ókili Aibek Smadiiarov aitty, dep habarlaidy QazAqparat.
«Ózbekstan Respýblikasy aýmaǵyndaǵy Sardoba sý qoimasy bógetiniń buzylýy jáne onyń saldarynan Túrkistan oblysynyń birqatar eldi mekenderin sý basý boiynsha jaǵdai bizdiń Úkimettiń erekshe baqylaýynda.
Ústimizdegi jylǵy 2 mamyrda Qazaqstan Prezidenti Qasym-Jomart Toqaev Ózbekstan Prezidenti Shavkat Mirziioevpen telefon arqyly sóileskeni jáne suhbat barysynda taraptar oryn alǵan jaǵdaidy naqty talqylap, eki el úkimeti úilesimdi jumys atqaratyny týraly ýaǵdalasqany málim.
Sý basý saldaryn birlesip joiý boiynsha úkimet pen shekaralas óńirler basshylarynyń tyǵyz ózara is-qimylyn nazarǵa ala otyryp, ózbek tarapyna QR Syrtqy ister ministrliginiń notasyn joldaý máselesi qarastyrylmaidy», - dedi A.Smadiiarov.
Resmi ókildiń aitýynsha, Túrkistan oblysynyń ákimi Ómirzaq Shókeev Ózbekstannyń kórshiles óńirlerine jedel túrde sapar jasaǵan. Ózbek tarapymen qajetti kelissózder júrgizip, onyń qorytyndylary týraly Úkimettiń búgingi otyrysynda baiandady.
«Ózderińizge málim, Premer-Ministrdiń orynbasary Roman Skliar bastaǵan Úkimettik komissiia quryldy. Erteń ol Túrkistan oblysy men Ózbekstanǵa birlesken is-qimyl algoritmin pysyqtaý úshin barady.
Eki taraptyń barlyq bailanystary tolyqtai Máńgilik dostyq jáne strategiialyq áriptestik týraly sharttardyń jáne Transshekaralyq sý aǵyndary men halyqaralyq kólderdi qorǵaý jáne paidalaný jónindegi Konventsiianyń normalaryna sáikes júzege asyrylady», - dedi ol.
Eske salaiyq, Ózbekstanda bógettiń jarylýynan Túrkistan oblysynyń birneshe eldi mekenin sý basty. 31 myńnan astam turǵyn evakýatsiialandy. Atqarylǵan jumystardan keiin sý basý qaýpi seiilgen Myrzakent, Aqjol aýyldarynyń 17 myńnan astam turǵyny úilerine qaita bastady.
Búgin Túrkistan oblysynyń ákimi Ómirzaq Shókeev Úkimet otyrysynda tótenshe jaǵdai saldarynan aldyn ala málimet boiynsha, 845 turǵyn úidi, 3 mektepti, 5 balabaqshany, 4 meditsina nysanyn, 1 mádenietin úiin, sonymen qatar 10 dúkendi sý basqanyn málim etti. Jeńis aýylyndaǵy kópirdi jáne respýblikalyq, oblystyq, aýdandyq mańyzy bar 54,7 shaqyrym avtomobil joly sý astynda qaldy. Munan bólek, aldyn ala jinaqtalǵan málimetterge sáikes, kólemi 7 639 gektar egistik jerin sý shaidy. Mal shyǵyny da naqtylanyp jatyr.
Sondai-aq Ózbekstan Maqtaaral aýdanyndaǵy barlyq kollektordy tazalaýǵa kómektesýge ýáde etkeni atap ótildi.
Premer-Ministr Asqar Mamin zardap shekkenderge Úkimetten qajetti barlyq kómek kórsetiletinin aitty.
