Qazaqstan Respýblikasy Syrtqy ister ministrligi Taýly Qarabaqtaǵy jaǵdaiǵa qatysty málimdeme jasady, dep habarlaidy "Ult aqparat".
«Ázerbaijan Respýblikasy Prezidentiniń, Armeniia Respýblikasy Premer-ministriniń jáne Resei Federatsiiasy Prezidentiniń Taýly Qarabaq qaqtyǵysy aimaǵyndaǵy atysty jáne barlyq áskeri is-qimyldardy toqtatý týraly málimdemesin joǵary baǵalaimyz.
Qol jetkizilgen ýaǵdalastyqtar BUU Qaýipsizdik Keńesiniń qararlaryna sáikes keledi jáne Taýly Qarabaq problemasyn retteý úshin negiz bola alady.
Osy kelisimge qol jetkizýdegi Resei Federatsiiasynyń syndarly rólin jáne onyń ýaǵdalastyqtardy is júzinde iske asyrýǵa baǵyttalǵan bitimgershilik kúsh-jigerin erekshe atap ótemiz», - delingen málimdeme mátininde.
Sondai-aq, QR Syrtqy ister ministrligi osy kúrdeli kezeńde ázerbaijan men armian halyqtary berik beibitshilik pen kelisim ornatý, óńirde qaýipsizdikti qamtamasyz etý úshin senimdi irgetas qalaýǵa umtylatyndaryna úmittenetinin jetkizgen.
Eske salsaq, Taýly Qarabaqta atysty toqtatý týraly málimdemege qol qoiylǵan bolatyn.
