QR Syrtqy ister ministrligi otandyq kostiýmderdi tigetin kásiporyndardyń tizimin jasaýǵa kiristi, dep habarlaidy "Ult aqparat".
Ministrliktiń resmi ókili Aibek Smadiiarovtyń aitýynsha, atalǵan tizim boiynsha otandyq kiim-keshekti satyp alýǵa mindet qoiylmaidy. Atalǵan qujattyń usynymdyq sipaty bolady.
«Qazirgi kezde otandyq kostiýmderdi tigetin jáne satatyn kásiporyndaryń tizimin jasap jatyrmyz. Sony barlyq diplomattarǵa taratamyz. Olar óz qalaýlary boiynsha sol jerge baryp, kiinetin bolady. Negizi, otandyq kostiýmderdiń sapasy sheteldik ónimderden esh kem emes. Máselen, men ózime jaqsy bir kostiýmdi tańdap aldym. Áitpese, shetelden keletin ónimdediń baǵasy tym qymbat. Endi, tasymaldaý shyǵyndary bar, salyqtar, dúkenniń jalǵa alyp otyrǵan jeri jáne taǵysyn taǵy. Al ózimizde tigilgen kostiýmder áldeqaida arzanǵa shyǵady», - dedi A.Smadiiarov jýrnalisterge bergen suhbatynda.
Onyń aitýynsha, otandyq kostiýmderdiń baǵasy 20-140 myń teńgeniń ainalasynda. «Mysaly, men keshe ózim «Altyn adam» kompaniiasyna bardym. Kostiým satyp aldym. Qazir olarda maýsymdyq jeńildik bolyp jatyr. Soǵan bailanysty kostiým baǵasy jeńildikpen 85 myń teńgege shyqty. Ol jerde baǵalar 20 myń teńgeden bastalyp, 120-140 myń teńgege deiin jetýi múmkin. Sapasy óte jaqsy. Shetelden kelgen taýardyń joly taǵy basqa shyǵyndary bar. Bizge kelgenshe qymbattaidy. Kelesi joly sol kostiýmdi mindetti túrde kiip kelemin. Qazirdiń ózinde kiip turǵan galstýgym - otandyq ónim. Budan bólek, ózimizde jaqsy aiaq kiimder de tigiledi. Almatyda, Shymkentte biraz jigitter osy kásippen ainalysady eken. Ózderi jasaidy, ózderi satady», - dep atap kórsetti A.Smadiiarov.
Eske salaiyq, Elbasy Nursultan Nazarbaev otandyq kásiporyndarǵa qoldaý kórsetý qajettigi týraly birneshe ret aitqan bolatyn. Bul máseleni 2018 jyldyń qazanynda kezekti Joldaýyn jariialaý kezinde de kóterdi.
