Qazaqstan Respýblikasy Syrtqy ister ministrligi Qyrǵyz Respýblikasyndaǵy qazaqstandyq kásiporyndardyń jaǵdaiyna qatysty málimdeme jasady, dep habarlaidy "Ult aqparat" vedomstvonyń saityna silteme jasap.
«Qyrǵyz Respýblikasyndaǵy qazaqstandyq investorlarǵa tiesili birqatar kásiporyndarǵa shabýyldar men olardy basyp alý áreketterine bailanysty úlken alańdaýshylyq bildiremiz.
Kásiporyndardyń Qazaqstan Respýblikasynyń azamattary bolyp tabylatyn qyzmetkerlerine kúsh jumsaý jáne osy kásiporyndardyń múlkin joiý týraly qaýip-qater kórsetý faktileri erekshe alańdatady.
Qazaqstandyq kompaniialar sońǵy jyldary Qyrǵyzstan ekonomikasyna 1 mlrd. AQSh dollarynan astam investitsiia quiyp, kórshi eldiń áleýmettik-ekonomikalyq damýyna eleýli úles qosty.
Qyrǵyz tarapyn Qazaqstan azamattarynyń da, Qyrǵyzstan aýmaǵyndaǵy qazaqstandyq kompaniialardyń da qaýipsizdigin qamtamasyz etý boiynsha dereý sharalar qabyldaýǵa shaqyramyz», delingen málimdemede.
Eske sala ketsek, Qyrǵyzstanda 4 qazanda Jogorký Keńesh depýtattaryn sailaý ótti. Al, 5 qazan kúni sailaý nátijesine kóńili tolmaǵan bir top adam ortalyq alańda miting uiymdastyryp, onyń sońy jappai tártipsizdikterge ulasty. Sherýge shyqqandar Aq úidi qorshap aldy, keiin rezidentsiiaǵa basyp kirdi.
Qyrǵyzstannyń sailaý komissiiasy Parlament sailaýynyń qorytyndysyn zańsyzdep tapty. «Dostýk» qonaqúiinde Jogorký Keńeshtiń kezekten tys otyrysy ótkizilip, onda Jogorký Keńesh tóraǵasy men Úkimet basshysy sailandy.
Alańdatarlyq jait, «Kyrgyzkómúr» filialyn basyp alǵandar kassadaǵy aqshany ielenip ketti. Sondai-aq «belgisiz bireýler qalalyq sý arnasyn basyp alýdy kózdep otyr» dep «Bishkeksýýkanaly» dabyl qaqty.
