Qazaqstan Respýblikasynyń Syrtqy ister ministrligi Ierýsalim qalasynyń mártebesine qatysty málimdeme jasady, dep habarlaidy "Ult aqparat" ministrliktiń baspasóz qyzmetine silteme jasap.
«Qazaqstan Ierýsalim qalasynyń mártebesine qatysty jaǵdaidyń shielenisýine orai óz alańdaýshylyǵyn bildiredi jáne barlyq múddeli taraptardy ustamdylyqqa shaqyrady», delingen habarlamada.
QR SIM BUU qararlary negizinde palestindik-izraildik retteýge qoldaýyn rastaidy.
«Ierýsalimniń qazirgi mártebesiniń saqtalýyn jaqtai otyryp, Qazaqstan halyqaralyq quqyq pen Birikken Ulttar Uiymy Bas Assambleiasy jáne Qaýipsizdik Keńesiniń 181 (1947), 242 (1967), 338 (1973), 2334 (2016) qararlary, sondai-aq 2002 jylǵy Arab beibit bastamasy negizinde palestindik-izraildik retteýge qoldaýyn rastaidy», dep atap ótken QR SIM.
Palestindik-izraildik qaqtyǵystyń sheshimi 1967 jylǵy shekaralarda astanasy Shyǵys Ierýsalim bolyp tabylatyn Palestina Memleketiniń qurylýyn kózdeitin «eki halyqqa eki memleket» qaǵidasyna sáikes iske asýy tiis, dep sanaidy Qazaqstannyń syrtqy saiasat vedomstvosy.
Qazaqstan BUU Qaýipsizdik Keńesiniń turaqty emes múshesi retinde Taiaý Shyǵysta beibitshilikti ornatýdyń ajyramas sharty bolyp tabylatyn óńirdegi turaqtylyqty qalpyna keltirý protsesine tolyq qoldaýyn kórsetýdi jalǵastyrady.
Esterińizge sala keteiik, osyǵan deiin AQSh prezidenti Donald Tramp Ierýsalimdi Izrail astanasy dep tanyǵanyn jariia etken. Izrail bolsa qalanyń shyǵys aýdandaryn, jarty ǵasyr buryn Iordaniiadan tartyp alynǵan jáne keiinirek anneksiialaǵan tarihi ortalyǵyn qosa alǵanda "birtutas ári bólinbeitin" astana dep jariialady. Alaida álemdik memleketter aneksiiany qoldamai, osy máseleniń taiaý shyǵystaǵy janjaldyń ýshyǵýyna áser beretinin aityp, Ierýsalimniń shyǵys bóligine úmitker palestinalyqtarmen beibit kelisimge kelýge shaqyrady. Al barlyq sheteldik elshilik Tel-Avivte ornalasqan.
