QR Syrtqy ister ministrligine Qyrǵyz Respýblikasy isteri jónindegi ýaqytsha ókil Kainarbek Toktomýshev shaqyrtyldy, dep habarlady QR SIM baspasóz qyzmeti.
Atalǵan kezdesýde Qazaqstan syrtqy ister ministriniń orynbasary Ǵalymjan Qoishybaev qyrǵyz diplomatyna Qyrǵyzstan Prezidenti Almazbek Atambaevtyń 2017 jyldyń 17 aqpanynda Euronews telearnasyna bergen suhbatyndaǵy pikirine qatysty «tańdanys pen narazylyq bildirilgen» notany tabystady.
Buǵan deiin qyzrǵyz biligi 2010 jyly kórshi elde bolǵan daǵdarysty jaǵdaidy retteýdegi Qazaqstan rólin birneshe ret atap ótken edi. Kóptegen halyqaralyq qurylymdar da oǵan joǵary baǵa bergen.
Bul másele boiynsha Astananyń resmi pozitsiiasy 2010 jylǵy 19 mamyrda QR SIM málimdemesinde baiandalǵan. Atap aitar bolsaq, onda «2010 jyldyń sáýirinde bolǵan qaiǵyly oqiǵalardyń alǵashqy kúninen bastap, Qazaqstannyń baýyrlas halyqqa ekijaqty negizde kómek pen qoldaý kórsetkeni» basa aitylǵan.
EQYU tóraǵasy bolǵan Qazaqstan tez arada QR Májilisi tóraǵasynyń orynbasary, yntymaqtastyq boiynsha qazaqstandyq-qyrǵyzstandyq parlament tobynyń jetekshisi, elshi Jánibek Káribjanovty Bishkektegi arnaiy EQYU elshisi etip taǵaiyndady.
Odan bólek, QR Prezidentiniń Qyrǵyzstandaǵy arnaiy elshisi taǵaiyndaldy, ol Qyrǵyzstannyń ýaqytsha úkimeti basshylyǵymen birqatar kezdesýler ótkizip, daǵdarysty jaǵdaidan shyǵý joldaryn talqylady.
Sonymen birge, Qazaqstan qysqa merzim ishinde óz kórshisine kómekter men kúshter jiberdi jáne eldegi egis naýqanyna qoldaý kórsetip, tez arada janarmai men tuqym jetkizdi. Jalpy alǵanda, Qyrǵyzstanǵa 11,6 million dollardan astam somaǵa qazaqstandyq gýmanitarlyq kómek jiberildi.
Qazaqstan qabyldaǵan osy jáne ózge sharalardyń nátijesinde kóptegen adam shyǵynyna ákep soǵatyn ýshyǵýlar oryn alǵan joq.
Qorytyndylai kele, qazaqstandyq tarap eki halyq arasyndaǵy dástúrli baýyrlas qarym-qatynastarǵa jáne Qazaqstan Respýblikasy men Qyrǵyz Respýblikasy arasyndaǵy odaqtyq qarym-qatynastar shartyna beiil ekendigin málimdeidi.
