Qazaqstanda Elektrondyq kommertsiiany damytýdyń 2019-2025 jyldarǵa arnalǵan jol kartasy bekitildi, ol 2025 jylǵa qarai elektrondyq saýdanyń úlesin qazirgi 2,9%-dan 5%-ǵa deiin arttyrýǵa múmkindik beredi, dep habarlady QR Úkimetiniń alańynda ótken baspasóz konferentsiiasynda QR saýda jáne integratsiia ministri Baqyt Sultanov.
«Elektrondy saýdany damytý úshin bizde barlyq zańnamalyq jaǵdailar jasalǵan. Zamanaýi saýda formattaryna da kóp kóńil bólinýde. 2019 jylǵy 2 sáýirde Biznes ortany damytý jáne saýda qyzmetin retteý týraly Zań qabyldandy, onda elektrondyq jáne birja saýdasyn damytý kózdelgen. Tiisti infraqurylym jasalýda. Qazir naryqta 20-ǵa jýyq platforma bar jáne shamamen 1700 kásipker elektrondy kommertsiiada jumys isteidi», — dep naqtylady B. Sultanov.
Onyń aitýynsha, Qazaqstan jetekshi álemdik korporatsiialardyń kómegimen internet arqyly saýdany damytýdy kózdeidi. 2019 jylǵy 26 tamyzda Ministrlik pen Reseidegi №1 «Wildberries» onlain-riteiler arasynda Ózara yntymaqtastyq týraly kelisimge qol qoiylǵan, onda «Wildberries» qatysatyn barlyq aýmaqta elektrondyq saýda arnalaryn qoldanyp, qazaqstandyq eksporttaýshylardyń halyqaralyq saýdaǵa qatysýy qarastyrylǵan. Qazaqstandyq taýarlardy eksporttaýdy ilgeriletý úshin basqa da sheteldik internet-alańdarymen osyndai jumystar júrgizý josparlanyp otyr.
«Biz olarmen birge elektrondy saýdany damytý júiesin ázirlep, onyń úlesin arttyratyn bolamyz. Búginde onyń jyldyq bólshek saýdaǵa qatysty úlesi - 2,9%. Memleket basshysynyń Qytaiǵa sapary aiasynda Alibaba tárizdi iri elektrondy alań ókilimen kezdesý josparlanǵan. Bul salada salmaqty oiynshylardyń bolýy bizge edáýir ári durys baǵytta damýǵa múmkindik beredi. Bizdiń kásipkerlerimiz álemdik oiynshylarmen belsene yntymaqtastyq ornata alady, nátijesinde bul Qazaqstanda elektrondy kommertsiiany qarqyndy damytýǵa múmkindik beredi», — dedi B. Sultanov, internet saýdadaǵy iri sýbektilermen yntymaqtasa jumys isteý qazaqstandyq ónimdi eksporttaýǵa múmkindik beretinin naqtylap.
B. Sultanov atap ótkendei, túsindirý máselelerine basa nazar aýdarylatyn bolady, óitkeni elektrondy kommertsiiada senim máselesi asa mańyzdy.
«Endi satyp alýshy kádimgi saýdadaǵy siiaqty elektrondyq saýdada da sol shamada qorǵalatynyn qosymsha atap ótemin. Jalpy biz tutynýshylardyń quqyqtaryn qorǵaý júiesin qaita qaraýdy jalǵastyrýdamyz jáne ony is júzinde barynsha pármendi etkimiz keledi. Qazaqstandyq ónimniń básekege qabilettiligin jaqsartý boiynsha jumysymyz naqty bir baǵytta júrgiziledi: elimizdiń árbir tutynýshysynda sapaly ónim bolýy tiis. Bizdiń maqsat – «azyq-túlik qubyryn» – óndiristen bastap túpkilikti satyp alýshyǵa deiin oryndy jáne qolaily tizbegin qurý. Qazaqstanda bolsyn nemese onyń sheginen tys bolsyn», — dedi ministr Baqyt Sultanov.
