Elordada QR Premer-Ministriniń orynbasary Berdibek Saparbaevtyń tóraǵalyǵymen QR Prezidentiniń janyndaǵy jastar saiasaty jónindegi keńestiń kezekti XXIII otyrysy ótti, dep habarlaidy "Ult aqparat".
Keńes otyrysynyń jumysyna Úkimet músheleri, respýblikalyq jastar uiymdarynyń kóshbasshylary, jastar saiasaty salasyndaǵy sarapshylar, sondai-aq jastar saiasaty máseleleri jónindegi óńirlik basqarmalardyń basshylary qatysty.
«Búgin Jastar jylynyń qorytyndysy men aldaǵy jylǵa bekitiletin sharalardy qarastyramyz. Ózderińiz bilesizder, Elbasy 2019 jyldy Jastar jyly dep jariialady. Árbir memlekettiń damýy eldiń jastaryna bailanysty. Sondyqtan ár memleket jastardyń damýyna, jańalyqtardy engizýine múmkindik jasaýy tiis», - dedi B. Saparbaev.
Onyń sózine qaraǵanda, Jastar jyly jobalaryn iske asyrý úshin jergilikti ári respýblikalyq biýdjetten, demeýshilerdiń kómegimen 300 mlrd teńgeden astam qarjy qarastyrylyp otyr.
«Úsh jylǵa Jol kartasy qabyldanǵanyn bilesizder. Sonyń ishinde tek qana biyldyń ózinde 90 mlrd teńgedei qarjy jumsaldy. «Eńbek» memlekettik baǵdarlamasy bar, onyń aiasynda qazirgi tańda jastar arasynan 170 myńnan astam adam qamtyldy. Atalǵan baǵdarlamanyń eń negizgi mindeti – jastardyń ózderiniń kásibin ashýǵa, qajetti mamandyq alýǵa jaǵdai jasaý. Jalpy, óńirlerdegi kezdesýlerde baǵdarlamalardyń, jol kartasynyń oryndalýy jóninde árdaiym aitamyz. Bizdiń maqsatymyz – sol jumystardy jalǵastyrý. Atap aitqanda, kelesi jyl Memleket basshysy Qasym-Jomart Toqaevtyń usynysymen Volonter jyly dep jariialandy. Bul qadam mańyzdy, sebebi eriktilerdiń negizi jastar ekeni belgili», - dedi Berdibek Saparbaev.
Aita keteiik, Keńes otyrysynda Aqparat jáne qoǵamdyq damý ministri Dáýren Abaev jastar jylyn ótkizý qorytyndysy boiynsha baiandap, onyń basym baǵyttaryn atap ótti.
Sonymen qatar, otyrysta «Qazaqstan jastarynyń kongresi» ZTB atqarýshy direktory T.Bolysovtyń, «Bolashaq» halyqaralyq stipendiiasy qaýymdastyǵynyń atqarýshy direktory L.Demesinovanyń, «Jasyl El» respýblikalyq shtabynyń basshysy A.Daniiardyń, «Ulanǵaiyr Dala eli» qoǵamdyq birlestiginiń direktory Ý.Bahretdinovtyń Jastar jyly aiasynda atqarylǵan jumystary týraly baiandamalary tyńdaldy.
Budan bólek, keńes músheleri 2020 jylǵa arnalǵan jastar saiasaty jónindegi keńestiń jumys josparyn maquldady.
Keńes otyrysynyń qorytyndysy boiynsha QR Premer-Ministriniń orynbasary B.Saparbaev jastardyń jumyspen qamtylýyn qamtamasyz etý, jumysqa ornalastyrý jáne kásipkerlik bastamany qoldaý jónindegi júieli jumysty uiymdastyrýdy jalǵastyrýdy júktedi. Munymen qosa, jastardy «Diplommen aýylǵa!», «Jastar tájiribesi», «Jasyl el», «Serpin» jáne basqa da áleýmettik jobalaryn iske asyrýǵa keńinen tartýdy turaqty negizde qamtamasyz etý, sondai-aq turǵyn úi qurylysy men jalǵa beriletin turǵyn úi berýdiń geografiiasyn keńeitý jónindegi máseleni pysyqtaý boiynsha birqatar tapsyrma berdi.
Esterińizge sala keteiik, QR Prezidentiniń janyndaǵy Jastar saiasaty jónindegi keńes – elimizdegi memlekettik jastar saiasatyn jetildirý boiynsha sharalardy ázirleýdegi basty dialog alańy bolyp sanalady.
