Búgin GFR-diń Shyǵys Eýropa, Kavkaz jáne Ortalyq Aziia elderimen yntymaqtastyq máseleleri jónindegi ýákili Mattias Liýtenberg bastaǵan delegatsiia elordaǵa keldi, dep habarlaidy QazAqparat tilshisi.
«Búgin Germaniia Federativtik Respýblikasy men Qazaqstan Respýblikasy arasynda diplomatiialyq qatynastyń ornaǵanyna 30 jyl tolýyn atap ótip otyrmyz. Verbaldyq notalardy almasýdan bastalyp, qazirgi tańda kópqyrly jáne qarqyndy qarym-qatynasqa ainaldy. Jeke ózim osy is-sharaǵa bailanysty Qazaqstannyń astanasy Nur-Sultanda bolǵanyma óte qýanyshtymyn. Ministrdiń orynbasary myrza, jańa ǵana jasalǵan syndarly jáne dostyq kelissóz úshin rahmet. Mereitoi bizge yntymaqtastyq deńgeiine oń baǵa berýge, sondai-aq bolashaqqa senimmen qaraýǵa múmkindik beredi. Germaniia Qazaqstannyń táýelsizdigin moiyndaǵan alǵashqy elderdiń biri boldy. Bizge Ortalyq Aziiadaǵy jańa memleketterdiń táýelsizdigine belsendi qoldaý kórsetý mańyzdy boldy», - dedi Mattias Liýtenberg BAQ-tyń qatysýymen ótken baspasóz máslihatynda.
Onyń aitýynsha, 30 jyldyń ishinde eki el arasynda senimdi qarym-qatynas ornaǵan.
«Qazaqstan Prezidenti Qasym-Jomart Toqaevtyń bastamasymen, onyń ishinde qazirgi ýaqytta Qazaqstannyń aldynda turǵan kúrdeli syn-tegeýrinderdi jáne qolǵa alynǵan reformalar protsesin súiemeldeýge jáne qoldaýǵa daiynbyz. Biz demokratiianyń nyǵaiýy men qoǵamnyń jańǵyrýy Qazaqstan halqynyń bolashaǵyna oń áser etetinine senimdimiz. Germaniia Qazaqstandy óńirdegi jáne halyqaralyq forýmdardaǵy mańyzdy bastamashy retinde, óńirlik yntymaqtastyq máseleleri boiynsha, sondai-aq klimattyń ózgerýi sekildi halyqaralyq problemalar boiynsha áriptes retinde baǵalaidy», - deidi ol.
