Memleket basshysy Nursultan Nazarbaevtyń AQSh-qa resmi saparyna orai QR Prezidentiniń Baspasóz hatshysy Aidos Úkibai «QazAqparat» halyqaralyq aqparat agenttiginiń birqatar suraqtaryna jaýap bergen.
- Aidos Ydyrysuly, Memleket basshysynyń Baspasóz hatshysy retinde Siz Qazaqstan Prezidentiniń jumys kestesinen udaiy habardarsyz. Jaqynda ǵana Siz Nursultan Nazarbaevtyń aldaǵy josparlarymen bólisken edińiz. Sizdiń oiyńyzsha, aldaǵy kúnderdegi eń mańyzdy oqiǵa ne bolmaq?
- Álbette, Memleket basshysynyń qyzmetindegi negizgi oqiǵa AQSh-qa resmi sapary bolady. Osy sapar aiasynda joǵary deńgeidegi kelissózder ótedi dep kútilýde. Nursultan Nazarbaevtyń AQSh Prezidenti Donald Tramppen kezdesýiniń kún tártibinde de keń aýqymdaǵy máseleler belgilengen. Bunda odan arǵy ekijaqty saiasi damý, saýda-ekonomikalyq ózara árekettestikter, Qazaqstan ekonomikasyna amerikalyq investitsiialardy tartý máselelerine erekshe nazar aýdarylady.
Budan bólek, BUU Qaýipsizdik Keńesine elimizdiń tóraǵalyǵy aiasynda Memleket basshysy atalǵan Keńestiń otyrysyna qatysyp, osynaý jahandyq organda sóz sóileitin bolady.
Tutastai alǵanda, bul tarihi sapardyń baǵdarlamasy mańyzdy sharalarǵa toly. Qazaqstan Prezidentiniń amerikalyq jetekshi saiasatkerlerimen jáne biznes ókilderimen kezdesýi de josparlanǵan.
Osyǵan bailanysty QR Prezidentiniń baspasóz qyzmeti tarihi sapardyń barysy men nátijelerinen aqparattar usynatynyn atap ótkim keledi.
- Qazaqstan Prezidentiniń AQSh-qa resmi saparynan qandai ekonomikalyq tiimdilik kútýge bolady?
- Sapar qorytyndysy boiynsha eki memleket prezidentteriniń keńeitilgen strategiialyq áriptestik týraly Birlesken málimdemesi qabyldanady dep kútiledi, onda HHI ǵasyrdaǵy qazaqstandyq-amerikalyq bailanystardy odan ári tereńdetý máseleleri qamtylady.
Sonymen qatar, kelissózder aiasynda birneshe milliard dollardy quraityn birqatar kelisimge qol qoiý josparlanǵan. Amerikalyq kapitaldyń qatysýymen júzege asatyn birlesken jobalar Qazaqstan ekonomikasynyń ártúrli salalaryn qamtidy. Memleket basshysynyń AQSh-qa resmi sapary ekijaqty qarym-qatynastarǵa jańa serpin berip, oǵan uzaqmerzimdi oń dinamika qalyptastyrady dep oilaimyn.
- Biylǵy jyldyń qańtarynan bastalǵan Qazaqstannyń BUU Qaýipsizdik Keńesine tóraǵalyǵynyń mánine toqtalyp ótseńiz?
- Bul oqiǵa elimizdiń halyqaralyq arenadaǵy mártebesi men bedelin kóteredi. Bul - bizdiń diplomatiiamyz úshin de baǵa jetpes tájiribe, osy arqyly álemdegi jáne óńirlerdegi jaǵdaiǵa áser etetin sheshimder qabyldaý protsesine elimizdiń qatysý múmkindigi týyp otyr. BUU Qaýipsizdik Keńesi komitetterinde basshylyq jasaý Qazaqstannyń álemniń ártúrli elderimen zamanaýi qaterler men qaýipterge qarsy kúreste ózara is-qimyldy odan ári kúsheitýine járdemdesetini anyq.
Qazaqstan osy arqyly qaýipsizdik salasynyń aǵymdaǵy jahandyq kún tártibin qalyptastyrýǵa, sondai-aq ortalyqaziialyq óńirdiń asa mańyzdy problemalary men múddelerin halyqaralyq arenada ilgeriletýge tikelei qatysýdyń jańa múmkindigine ie bolyp otyr.
- Suhbatyńyzǵa raqmet!
