Qazaqstan Respýblikasynyń Memlekettik hatshysy Qyrymbek Kósherbaevtyń tóraǵalyǵymen beinekonferentsiia bailanysy rejiminde QR Prezidenti janyndaǵy Sybailas jemqorlyqqa qarsy is-qimyl máseleleri jónindegi komissiianyń otyrysy ótti, dep habarlaidy "Ult aqparat" Aqordaǵa silteme jasap.
Otyrysta «Qazaqstan Respýblikasynyń agroónerkásiptik keshenin damytýdyń 2017-2021 jyldarǵa arnalǵan memlekettik baǵdarlamasyn iske asyrýǵa bólingen biýdjet qarajatynyń paidalanylý tiimdiligi týraly» másele talqylandy.
Jiynda Tuńǵysh Prezident – Elbasy N.Á. Nazarbaevtyń tikelei tapsyrmasymen ázirlengen Memlekettik baǵdarlamany iske asyrýdyń strategiialyq mańyzy bar ekeni atap ótildi. Óitkeni agroónerkásiptik keshen eldiń azyq-túlik qaýipsizdigin qalyptastyratyn ekonomikanyń mańyzdy sektorlarynyń biri bolyp tabylady.
Memleket basshysy Q.K. Toqaevtyń «Jańa jaǵdaidaǵy Qazaqstan: is-qimyl kezeńi» atty Qazaqstan halqyna Joldaýynda damyǵan aýyl sharýashylyǵynsyz básekege qabiletti ekonomika qurýdyń múmkin emestigine basa nazar aýdaryldy.
Otyrys barysynda Aýyl sharýashylyǵy ministrligi agrosektordyń jalpy óniminiń kólemin 1,4 esege arttyrýǵa jáne onyń qunyn 5,2 trln. teńgege deiin jetkizýge múmkindik bergen Memlekettik baǵdarlamany iske asyrýdyń oń áseri týraly baiandady.
Budan basqa, aýyl sharýashylyǵyndaǵy negizgi kapitalǵa investitsiialar 2 esege, eńbek ónimdiligi 1,8 esege, aýyl sharýashylyǵy ónimderi men ony qaita óńdeý ónimderiniń eksporty 1,5 esege, al mal sharýashylyǵy men ósimdik sharýashylyǵy ónimderiniń jalpy shyǵarylymy 1,4 esege ulǵaidy.
Buǵan kóp jaǵdaida aýyl sharýashylyǵy taýar óndirýshilerin qoldaýǵa bólinetin, agroónerkásiptik keshen sýbektileriniń qarjylyq jaǵdaiyn edáýir jaqsartqan biýdjet qarajaty yqpal etti.
Sonymen qatar baqylaýshy jáne quqyq qorǵaý organdary mal sharýashylyǵy salasyndaǵy sýbsidiialaýdyń qoldanystaǵy júiesi aýyl sharýashylyǵy óniminiń kóp bóligin óndiretin shaǵyn aýyl sharýashylyǵy qurylymdaryna qatysty jetkilikti deńgeide teńdestirilmegenin aitady.
Atalǵan salada óndiris quraldarynyń tozý, ozyq tehnologiialardy jetkiliksiz qoldaný jáne qarjy quraldaryn utymdy paidalanýdy qamtamasyz etý problemalary bar.
Sýbsidiialaý salasyndaǵy normativtik-quqyqtyq bazanyń jáne «Qoldau.kz» tsifrlyq platformasynyń jetildirilmeýinen sýbsidiia alýǵa ótinim bergende túrli teris áreketterge jol beriledi.
Máselen, Memlekettik baǵdarlamany iske asyrý barysynda 169 qylmystyq quqyq buzýshylyq anyqtalǵan, onyń ishinde aýyl sharýashylyǵy óndirýshilerine jalǵan qujattar boiynsha sýbsidiialardy zańsyz berý faktilerine jol berilgen.
Osylaisha, Memlekettik baǵdarlamany júzege asyrýdyń jekelegen aspektileri Memleket basshysynyń tapsyrmalarymen, ásirese jeke qosalqy sharýashylyqtardyń áleýetin arttyrý, sondai-aq olardy óńirlik azyq-túlik habtaryn qurýǵa tartý bóligimen sáikes kelmeidi.
Otyrysta Prezidenttiń Kómekshisi – Qaýipsizdik Keńesiniń hatshysy Áset Isekeshev agroónerkásip keshenindegi sybailas jemqorlyq táýekelderin tómendetý boiynsha usynys jasady.
Otyrys qorytyndysy boiynsha Qazaqstan Respýblikasynyń Memlekettik hatshysy Qyrymbek Kósherbaev qaralǵan máseleler boiynsha naqty tapsyrmalar berdi, olardyń oryndalýy baqylaýǵa alyndy.
