Qazaqstan Prezidenti Qasym-Jomart Toqaev saiasatqa qatysty buryn aita almai júrgen máseleni qozǵady.
Mundai pikirdi «Kieli Qazaqstan» ǵylymi-zertteý ortalyǵynyń basshysy, Ulttyq qoǵamdyq senim keńesiniń múshesi Berik Ábidǵaliuly bildirdi, dep habarlaidy QazAqparat.
«Prezidenttiń alǵashqy Joldaýy bolǵannan keiin eldiń arasynda qyzyǵýshylyq joǵary boldy. Ekinshi Prezidentimizdiń halyqqa Joldaýyn úlken úmitpen, senimmen qaradyq. Senim aqtaldy. Biraz másele kóterildi. Sonyń ishinde saiasatqa qatysty naqty-naqty máseleler, saiasi reformalardy ilgeriletý, damytý máselesi qozǵaldy. Búgingi kúni saiasi modernizatsiia jasalmai ekonomika damymaidy degen tezisti aitty. Bul buryn biz aita almai júrgen másele edi», - dedi Berik Ábdiǵaliuly Memleket basshysynyń Joldaýyna orai pikir bildire kele.
Onyń atap ótýinshe, elimizdiń ekonomikasy damydy. Degenmen, onyń munan ary qarai dami túsýi saiasatqa, áleýmettik máselelerge tirelip tur.
«Bizde «tiimdi memleket» printsipi jumys isteýi kerek. Al ol tiimdi jumys isteýi úshin sailaý bolýy qajet. Laiyqty, eldiń arasynda bedeldi azamattar kóshege sherýge shyqpaýy kerek. Olar Parlamentte, máslihatta otyrýy kerek. Sol jerden máselelerdi kóterýi tiis. Sonda eldiń bilikke degen senimi artady. Joldaýda osy jaiynda da aityldy. Bul úlken saiasi qadam. Endi osyny ary qarai ilgeriletip, qoǵam bolyp qoldaý kórsetý - bizdiń aldymyzda turǵan paryzymyz, mindetimiz», - dedi ol.
Esterińizge sala keteiik, búgin Memleket basshysy Qasym-Jomart Toqaev qoǵamdy mazalaǵan negizgi máseleler kóshelerde emes, azamattyq dialog aiasynda Parlamentte sheshilýi tiistigin aitqan edi.
