Qazaqstan Respýblikasynyń Prezidenti Qasym-Jomart Toqaev pravoslav hristiandaryn Pasha merekesimen quttyqtady, dep habarlaidy "Ult aqparat" Aqordaǵa silteme jasap.
"Qurmetti otandastar!
Barsha pravoslav hristiandaryn Pasha merekesimen quttyqtaimyn!
Bul kún dindar adamdardyń júregin meiirim men qýanyshqa bólep, rýhani qundylyqtar men biik adamgershilik idealdardy qurmetteýge, igi isterge úndeidi.
Dástúrli Pasha meiramy otbasylyq qasietterdi, qaiyrymdylyqty, jaqyn janǵa degen mahabatty, adamdardyń bir-birine janashyrlyq tanytýyn ulyqtaidy.
Qazaqstan Respýblikasynyń Tuńǵysh Prezidenti – Elbasynyń kemel saiasatynyń arqasynda elimizde beibitshilik pen kelisim ornaǵan, sondai-aq, barlyq etnostar men konfessiialar ózara syilastyqta ómir súrýde.
Qazaqstandyqtar ósip-órkendeý jáne damý jolynda árdaiym yntymaq pen birlik tanytyp keledi.
Pasha meiramy sizderge baq-bereke ákelip, igi bastamalaryńyzdyń jarshysy bolsyn!", - delingen Memleket basshysynyń quttyqtaýynda.
Aita keteiik, Pasha meiramy pravoslav hristiandarynyń basty merekesi sanalady. Bul kúni 48 kúnge sozylǵan aýyz bekitý aiaqtalady. Osy ýaqyt aralyǵynda hristian dinin ustanatyndar mal etinen bas tartyp, jaman ádetterden boiyn aýlaq ustaidy. Boiyn tártipke úiretip, jii syiynady. Osylaisha rýhani tazarady.
Pashaǵa hristiandar erekshe daiyndalady: úilerin tazalap, merekelik astardy ázirleidi. Boialǵan jumyrtqalardy pisiredi.
Merekeniń ýaqyty ár jyly ár kúnge túsip otyrady, biraq sáýir aiynda nemese mamyr aiynyń basynda bolady.
.jpeg)