Nursultan Nazarbaev oblystardyń, Astana jáne Almaty qalalarynyń ákimderimen keńes ótkizdi, dep habarlaidy "Ult aqparat" Aqordanyń baspasóz qyzmetine silteme jasap.
Memleket basshysy jiyn barysynda oblystar men respýblikalyq mańyzy bar qalalardyń ákimderine azyq-túlik baǵasynyń turaqtylyǵyn baqylaý jáne tarifterdi retteý máselesin nazarda ustaý qajettigin aitty.
Elbasy oblystarda jylytý maýsymyn irkilissiz júrgizýdiń mańyzdylyǵyn atap ótti.
Sondai-aq, Qazaqstan Prezidenti Úkimetke oblystar ákimderimen birlesip, kóktemdegi sý tasqyny qaýpiniń aldyn alý jáne ony boldyrmaý jóninde sharalar qabyldaýdy tapsyrdy.
Memleket basshysy erigen qardyń sýyn toǵandarǵa jinap, olardy aýyl sharýashylyǵy qajettiligine paidalaný múmkindikterin qarastyrýdy usyndy.
- Halyq sany eki myńnan asatyn aýyldyq eldi mekenderde jergilikti ózin-ózi basqarý júiesi engiziletin bolady. Bul - biýdjettiń tórtinshi deńgeii. Jergilikti jerlerge salyqtyń 7 túrin jinaý múmkindigi berildi, sondai-aq qarajat shyǵysy 19 baǵyt boiynsha júzege asyrylady. Aldyn ala jasalǵan taldaý boiynsha, aýyldyq okrýgterdiń 11 paiyzy ǵana ózderin qamtamasyz etip, óz kirisi esebinen shyǵyndaryn jaba alady. Sondyqtan Úkimet oblystar basshylarymen birlese otyryp, osy máseleni de baqylaýǵa alýǵa tiis, - dedi Nursultan Nazarbaev.
Sonymen birge, Qazaqstan Prezidenti elimizdi damytý jobalary men baǵdarlamalarynyń mańyzdy sipatqa ie bolyp otyrǵanyn halyqqa keńinen túsindirý jáne bul iske «Nur Otan» partiiasyn tartý qajettigin atap ótti.
Basqosý barysynda Astana qalasynyń, Qyzylorda, Qaraǵandy jáne Shyǵys Qazaqstan oblystarynyń ákimderi óńirlerdegi ahýal týraly baiandady.
