Qazaqstan men AQSh arasynda eshqandai túsinispeýshilik joq. Onyń ústine AQSh - Qazaqstanǵa investitsiia salǵan iri memleketterdiń biri. Bul týraly otandyq BAQ ókilderine bergen suhbatynda Elbasy Nursultan Nazarbaev aitty, dep habarlaidy QazAqparat.
AQSh prezidenti Donald Tramppen kezdesýi týraly suraqqa jaýap bergen Qazaqstan Prezidenti AQSh pen Qazaqstan arasyndaǵy yntymaqtastyq ary qarai dami beretinin atap ótti.
«Sizdiń AQSh prezidentimen kezdesýińizge tarihi sapar degen baǵa berilgen bolatyn. Kóptegen adamdar sol kezde Siz ben AQSh prezidenti arasynda paida bolǵan «himiia» týraly jarysa jazǵan edi. Áiel men erkek arasyndaǵy «himiia» túsinikti-aý, alaida Prezidentter arasyndaǵy «himiia» degen ne? Osy týraly aityp bere alasyz ba? Sol kezdesýdiń tarihi mańyzyna qalai baǵa berer edińiz?», - degen suraq qoiyldy.
Bul suraqqa jaýabynda Nursultan Nazarbaev Donald Tramppen osy jolǵy kezdesýi - AQSh-qa 11-shi sapary bolǵanyn eske aldy.
«Ol - meniń altynshy resmi saparym. AQSh-tyń san jaǵynan besinshi prezidentimen kezdesýge bardym. Qanshalyqty ejelgi ekenimdi bile berińiz (kúldi). Tarihi mańyzy jaǵynan alǵanda AQSh-tyń jańa prezidentimen kezdesýge barǵan kezimdi aitar edim. Onyń BAQ-qa degen qarym-qatynasy erekshe eken. Onyń amal-ádisi tolyǵymen biznesmenniń is-áreketine sai keledi. Sondyqtan onymen kezdesý maǵan paida ákelýi kerek dep oiladym», - dedi Nursultan Nazarbaev.
Prezident óz sózinde Amerika qazirgi tańda álemdegi eń iri derjava ekenin atap ótti. Elbasy Amerikany derjava retinde moiyndaý qajettigin tilge tiek etti.
«Alaida teketirestiń saldarynan sol baiaǵy Eýropanyń, Reseidiń, Qytaidyń ekonomikasynyń álsireýi býmerang bolyp oralyp, Amerikanyń da ekonomikasyna soqqy bolyp tieri anyq. Eger seniń ekonomikańnyń ósimi joǵary bolsa, óz taýaryńdy mindetti túrde bireýge satyp, ary qarai damýdyń jolyn izdeý kerek. Eger bul teketires búkil álemdik ekonomikaǵa keri áserin tigizer bolsa, seniń elińe de ońai bolmaidy. Sol úshin biz óte sátti kelissózderdi júrgizdik. Kezdesý óte jaily boldy. Alǵashqy minýttardan bastap ol bizdi jaqsy qarsy aldy. Oǵan deiin eki márte telefon arqyly sóileskenbiz. Er-Riadta bir márte kezdesken edik. «Himiia» degen sóz - eki saiasatkerdiń birin-biri túsinýi der edim. Keide prezidentter bir-birimen til qatysyp tursa da, ishki ashýdan bir-birine birdeńe aitqysy kelip turatyny bar. Al bizde ondai eshteńe joq», - dedi Prezident.
Nursultan Nazarbaev Qazaqstan men AQSh arasynda eshqandai túsinispeýshilik joq ekenin alǵa tartty.
«Amerika - Qazaqstannyń iri investory. Osyǵan deiin 40 mlrd AQSh dollaryn saldy. Ortaq investitsiia 300 mlrd desek, bálkim osy jyly AQSh investitsiianyń mólsheri 50 mlrd dollarǵa taqap qalýy kerek. AQSh prezidenti de munyń bárin jaqsy bilip otyr. Bizde energetikalyq yntymaqtastyq bar. Ekstremizmge qarsy kúreste de biz árdaiym til tabysyp kelemiz», - dedi ol.
Nursultan Nazarbaev AQSh pen Resei arasyndaǵy sanktsiialyq daý Qazaqstanǵa jaisyz tietinin aitty.
«Álbette, bul bizdi de irep ótedi. Sondyqtan, áńgime sońynda men oǵan «bul bizdi irep ótpesin, bizdiń qatysymyz joq» degen edim. Biraq, bul másele bizge de báribir tiedi. Biraq, biz strategiialyq qarym-qatynasty nyǵaitýǵa kelistik. Biz tikelei telefon bailanysyn ornatýǵa kelistik. Qazir ol jumys júrgizilip jatyr. Ol osy aimaqtyń máseleleri boiynsha menimen aqyldasýdy jón kórip otyr. Biz Resei men Ýkraina, Soltústik Koreia men Qytai, Siriia - barlyq másele boiynsha sóilestik. Ol meniń oiymdy bilgisi keldi. Men bolsam tikelei ne oilaitynymdy aittym. Ol meniń sózimdi tyńdap, óz tarapyna «kórdińder me, Qazaqstanǵa mańaiyndaǵylardyń bári dos. Al bizde she?» dep surap jatty. Men bolsam «Endi buǵan kim kináli?» degim keldi», - deidi Elbasy.
Prezident sonymen birge sol kezdesý barysynda quny 7 mlrd teńgeniń 20 qujatyna qol qoiylǵanyn atap ótti.
«Sodan keiin Qazaqstanǵa AQSh-tyń saýda ministri kelip, ózimen birge biznesmenderdi alyp ketti. Bailanys jalǵasýda. Bizdiń ministrler de ol jaqqa bardy. Kóptegen suraqtar boiynsha qarym-qatynasymyzdy jalǵastyryp kelemiz. Biz Qazaqstan úshin AQSh qarai on jyldyq viza týraly kelisip aldyq. Meniń oiymsha, bárin durys jasaǵan sekildimiz. Sondyqtan, ózderińiz kórip otyrǵandai, bul sapar eki el úshin óte paidaly boldy. Sondyqtan, aradaǵy «himiia» áli jumys istep tur», - dedi Nursultan Nazarbaev.
