Tájik tarapynyń usynysy boiynsha Memleket basshysy Qasym-Jomart Toqaev Tájikstan Prezidenti Emomali Rahmonmen telefon arqyly sóilesti, dep habarlaidy Aqorda.
Memleketter basshylary koronavirýs pandemiiasynyń taralýy men onyń teris áserine bailanysty óńirdegi epidemiologiialyq jáne ekonomikalyq qaýipsizdikti qamtamasyz etý máselelerin talqylady. Taraptar COVID-19 indetine qarsy kúreste eki el úkimetteriniń qabyldap jatqan sharalary men naqty is-áreketteri týraly aqparat almasty.
Osy oraida Tájikstan Prezidenti atalǵan qaterli indettiń taralýyn boldyrmaý jónindegi Qazaqstannyń qabyldaǵan sheshimderin joǵary baǵalap, azamattarǵa, otandyq shaǵyn jáne orta kásipkerlikke der kezinde kómek kórsetkenin atap ótti.
Emomali Rahmon Qasym-Jomart Toqaevqa qiyn-qystaý kezeńde tájik halqyna kórsetken qoldaýy, onyń ishinde, Tájikstannyń ótinishi boiynsha gýmanitarlyq kómek retinde 5 myń tonna un jetkizgeni úshin rizashylyǵyn bildirdi. Sondai-aq ol Tájikstannyń azamattaryn otanyna qaitarýǵa jáne Qazaqstan shekarasynan júk tasymalyn toqtaýsyz ótkizýge yqpal etkeni úshin alǵys aitty.
Memleket basshysy Qazaqstan men Tájikstan arasyndaǵy dástúrli dostyq qatynastardyń ózara qoldaýǵa jáne ashyqtyqqa negizdelgenin atap ótti.
– Saýda kólemi boiynsha Qazaqstan Tájikstannyń ekinshi seriktes eli sanalady. Sondyqtan biz ekijaqty saýda ainalymyn, ásirese, azyq-túlik ónimderin jetkizý arqyly odan ári arttyrýǵa múddelimiz, – dedi Qazaqstan Prezidenti.
Halyqaralyq kún tártibindegi máselelerdi talqylaý barysynda Qasym-Jomart Toqaev elimizdiń ekijaqty jáne kópjaqty formattaǵy, onyń ishinde, BUU, Aziiadaǵy ózara is-qimyl jáne senim sharalary jónindegi keńes alańdarynda tabysty jumys júrgizip kele jatqanyn aitty. Osyǵan bailanysty Memleket basshysy Tájikstan Prezidentine Qazaqstannyń bastamalaryn jan-jaqty damytýǵa turaqty qoldaý kórsetip kele jatqany úshin rizashylyǵyn bildirdi.
Dostas halyqtarymyzdyń, sondai-aq, jalpy Ortalyq Aziia elderiniń igiligi men qaýipsizdigin saqtaýdyń mańyzdylyǵyn eskere otyryp, taraptar Tájikstan Prezidentiniń birqatar naqty usynystarynyń júzege asyrylý múmkindikterin qarastyrý úshin eki eldiń úkimetterine tapsyrma berýge kelisti.
Sóz sońynda Tájikstan Prezidenti Emomali Rahmon Qazaqstannyń Tuńǵysh Prezidenti - Elbasy Nursultan Nazarbaevqa júrekjardy sálemin joldady.
