Elbasy Aqparat jáne kommýnikatsiialar ministri Dáýren Abaevty qabyldady, - dep habarlaidy "Ult aqparat" Aqordaǵa silteme jasap.
Memleket basshysyna kezdesýde Aqparat jáne kommýnikatsiialar ministrligi aldyna qoiylǵan mindetterdiń oryndalýy jóninde esep berildi.
Nursultan Nazarbaev memlekettik saiasattyń birqatar baǵyty boiynsha sapaly aqparattyq jumys júrgizýdiń mańyzdylyǵyn atap ótti.
– Birinshiden, aqparat quraldarynda indýstriialyq-innovatsiialyq damý baǵdarlamasynyń iske asyrylýy barysyn kórsetý kerek. Ekinshiden, «Nurly Jol» infraqurylymdyq damý baǵdarlamasyn oryndaý jumysyn nasihattaýdy kúsheitý qajet. Mysaly, «Nurly jol» baǵdarlamasy men Qytaidyń «Jańa Jibek joly» strategiiasynyń ushtasýynyń oń aspektileri týraly áńgimelep berýge bolar edi. Infraqurylymdyq damý aiasynda birinshi jyly – 1600 shaqyrym, al byltyr 900 shaqyrym jol salyndy. Men ol týraly birneshe ret aittym. Biraq buqaralyq aqparat quraldarynda bul fakt jariia etilmedi, – dedi Qazaqstan Prezidenti.
Sonymen qatar, Memleket basshysy Qazaqstannyń tranzittik-kóliktik áleýetin aqparattyq turǵyda kórsetýdiń ózektiligine toqtalyp, el óńirindegi infraqurylymdyq jobalardyń iske asyrylýyn BAQ-ta jariia etý qajettigin atap ótti.
Budan bólek, Nursultan Nazarbaev «Qazaqstannyń úshinshi jańǵyrýy: jahandyq básekege qabilettilik» atty joldaýdyń jáne «100 naqty qadam» Ult josparynyń negizgi erejelerin júzege asyrý úderisine aqparattyq turǵydan keńinen qoldaý kórsetý qajettigine nazar aýdardy.
Aqparat jáne kommýnikatsiialar ministri Qazaqstan Prezidentine «Qazaqstannyń 100 jańa esimi» jobasynyń iske asyrylýy jáne qoǵamdyq sanany jańǵyrtýdyń barlyq baǵyty boiynsha aqparattyq-túsindirý jumystarynyń júrgizilý barysy týraly baiandady.
Memleket basshysy kezdesý qorytyndysy boiynsha birqatar naqty tapsyrma berdi.
.jpeg)