Memleket basshysy Qasym-Jomart Toqaev BUU-nyń Jenevadaǵy bólimshesiniń Bas direktory Tatiana Valovaiamen kezdesti. Bul týraly Aqordadan málim etti, dep habarlaidy "Ult aqparat".
Kezdesý barysynda Qazaqstan men BUU arasyndaǵy yntymaqtastyqtyń basym baǵyttary talqylandy. Pandemiiaǵa qarsy kúres, aimaqtyq qaýipsizdik pen turaqtylyqty qamtamasyz etý boiynsha kúsh-jiger jumyldyrý máselelerine basa mán berildi.
Prezident Qazaqstanda pandemiiaǵa qarsy kúres boiynsha qabyldanyp jatqan sharalar, sondai-aq DDSU Dúniejúzilik densaýlyq saqtaý assambleiasynyń arnaýly sessiiasynda koronavirýstyń jańa shtammdaryna birlesip qarsy turý úshin basqa elderge úndeý tastaǵanyn aitty.
Qasym-Jomart Toqaev qazirgi jaǵdaida Birikken Ulttar Uiymy mýltilateralizm júiesiniń negizi bolyp qala beretinin atap ótti. Qazaqstan táýelsizdiktiń alǵashqy kúnderinen bastap dúniejúzilik uiymnyń qaǵidattaryna, maqsattary men mindetterine beiildi boldy jáne solai bola beredi.
Memleket basshysy Qazaqstannyń iadrolyq qarýsyzdanýǵa jáne jappai qyryp-joiý qarýyn taratpaý rejimin nyǵaitýǵa eleýli úles qosatynyn jáne osy jumystardy jalǵastyra beretinin jetkizdi.
Kezdesýde Ortalyq Aziiadaǵy ahýal, Aýǵanstanǵa kómek kórsetý jónindegi BUU Missiiasyn (UNAMA) Almatyda ornalastyrý máselesi, Ornyqty damý maqsattary boiynsha BUU-nyń óńirlik ortalyǵyn óz aýmaǵynda qurý jónindegi Qazaqstannyń bastamasy talqylandy.
Áńgimelesý barysynda Qazaqstanda júrgizilip jatqan saiasi reformalar, adam quqyqtary men bostandyǵy, genderlik máseleler sóz boldy.
Tatiana Valovaia Memleket basshysyn Qazaqstan Táýelsizdiginiń 30 jyldyǵymen quttyqtap, elimizdiń osy ýaqyt aralyǵynda eleýli jetistikterge qol jetkizgenin atap ótti. Ol Qasym-Jomart Toqaevqa 2011-2013 jyldary ózi basqarǵan BUU-nyń Jeneva bólimshesindegi ujymynyń ystyq sálemin jáne izgi tilekterin jetkizdi.
