Qazaqstan Prezidenti Qasym-Jomart Toqaev «MIR» telearnasyna bergen suhbaty barysynda TMD elderi basshylarynyń qaisysymen ortaq til tabysý ońai ekendigin aityp berdi, - dep habarlaidy "Ult aqparat".
«Birneshe til bilý - bul qajettilik dep sanaimyn. Prezidentterdiń, Memleket basshylarynyń bireýin bóle-jara qaramas edim. Túsinikti sebepterge bailanysty konstrýktivti, adami turǵyda Resei Federatsiiasynyń Prezidenti Vladimir Pýtinmen janǵa jaily suhbat bolatyndyǵy túsinikti. Qytai tóraǵasy Si Tszinpinmen de óte jaqsy sóilesemiz. Kórshiles memleketterdiń basshylary - Ózbekstan, Tájikstan Prezidentterimen de jaqsy qarym-qatynastamyn. Taiaýda ǵana Belarýs Prezidenti saparmen kelip ketti. Sondyqtan kóshbasshylar arasyndaǵy qarym-qatynas jolynda eshqandai kedergi joq dep oilaimyn», - dedi QR Prezidenti.
Osy rette Memleket basshysy tanymal psiholingvist Frenk Smittiń «Bir til sizdi ómir dálizine alyp kelse, eki til sol joldaǵy barlyq esikti ashady» degen sózin eske aldy.
«Halyqaralyq deńgeidegi saiasatker kez kelgen áńgimelesýshisimen ortaq til tabysa alýy tiistigine senimdimin. Sebebi, muny saiasi ádep erejesi ǵana emes, onyń memleketiniń múddesi de talap etedi. Ózge memlekettiń tilin, mádenietin, tarihyn bilý til tabysýǵa, suhbattasýshynyń ustanymyn, onyń qaǵidasyn túsinýge, al bul óz kezeginde ózara túsinistikke, tipti kúrdeli kelissózder barysynda ymyraǵa kelýge múmkindik beredi», - dedi Qasym-Jomart Toqaev.
