Aqorda rezidentsiiasynda birqatar memlekettiń jańadan taǵaiyndalǵan tótenshe jáne ókiletti elshileriniń Qazaqstan Prezidentine senim gramotalaryn saltanatty túrde tapsyrý rásimi ótti, – dep habarlaidy «Ult aqparat».
Memleket basshysyna Braziliia Federativtik Respýblikasynyń elshisi Rýbem Antonio Korrea Barboza, Oman Sultanatynyń elshisi Muhammed ben Abdýlla ben Salih Ál-Bahrani, Koreia Respýblikasynyń elshisi Ký Hong-sok senim gramotalaryn tapsyrdy.
Qasym-Jomart Toqaev elshilerdi Qazaqstandaǵy diplomatiialyq jumystarynyń bastalýymen quttyqtap, olarǵa tabys tiledi.
«Sizderdiń elderińizben aradaǵy qarym-qatynasymyz joǵary deńgeide. Osy múmkindikti paidalana otyryp, sizderdiń memleketterińizdiń basshylaryna sálem joldaimyn. Elderimiz arasyndaǵy ózara yqpaldastyqtyń odan ári damýyna úles qosasyzdar dep senemin. Sizder búkil álem pandemiiadan zardap shegip jatqan qiyn-qystaý ýaqytta bizdiń elimizge keldińizder. Qazaqstan bul qaýipti dertti jeńý úshin der kezinde sheshim qabyldap jatyr. Bul ońai jumys emes. Biraq biz halyqaralyq yntymaqtastyqqa arqa súieimiz, BUU-nyń is-áreketterin qoldaimyz. Sonymen qatar álemdegi barlyq el kúsh biriktire otyryp, atalǵan dertti jeńedi dep úmittenemiz», – dedi Prezident.
