Baiqońyr – Qazaqstannyń shyn máninde ǵaryshtyq memleket ekeniniń dáleli. Bul týraly Memleket basshysy Qasym-Jomart Toqaev «31arnada» kórsetilgen «Prezident 2.0» derekti filminde aitty, dep habarlaidy QazAqparat.
«Birinshiden, Baiqońyr arqyly Reseimen tyǵyz bailanystamyz. Máskeýde, Kremldegi taiaýda ótken kelissózder barysynda bul taqyryp qozǵaldy. V.Pýtin eki el arasyndaǵy bul seriktestikke jaqsy qaraidy. Soǵan orai tapsyrmalar beredi. Osy kelissózderdiń nátijesinde men «Roskosmos» basshysy Dmitrii Rogozindi qabyldadym», - dedi Memleket basshysy.
Qazaqstan Prezidenti eki eldiń arasynda bolashaqta júzege asyrylatyn úlken josparlary bar ekendigin atap ótti.
«Baiqońyr – Qazaqstannyń shyn máninde ǵaryshtyq derjava nemese ǵaryshtyq memleket ekeniniń dáleli», - dedi Qasym-Jomart Toqaev.
Qazaqstan Prezidenti búkil álem boiynsha jer astynda bolsyn, ústinde bolsyn bir poligonda 450-den astam jarylystyń bolmaǵandyǵyn atap ótedi.
«Eń bastysy, jergilikti turǵyndarǵa jarylys týraly, qandai da bir shara qoldaný týraly eskertý jasalmaǵan. Jerdi dezaktivatsiia jasamaǵan. Bul iadrolyq jarylystardyń zardaby áli kúnge deiin sezilip keledi. Sondyqtan Elbasy Nursultan Ábishuly Nazarbaev Sovet odaǵynyń tusynda-aq óz Jarlyǵymen bul poligondy jabý týraly sheshim qabyldaǵan. Sodan beri BUU Bas assambleiasynyń sheshimimen 29 tamyz álem boiynsha iadrolyq qarýdy synaýǵa tyiym salý kúni retinde atalyp ótiledi», - dedi Memleket basshysy.
Sonymen qatar, Prezident qazaq úshin daladan qymbat eshteńe joq ekenin aitty.
«Step» sózi qazaqsha - dala. Al «Uly dala» - ulan-baitaq elimiz, qazaqtyń jeri, Qazaqstan degendi bildiredi. Sondyqtan dalany barsha qazaqtyń atamekeni dep ataimyz. Biraq, bizdiń taýlarymyz da bar, Almatyda», - dedi QR Prezidenti.
Memleket basshysy jerimizdiń aýmaǵyndaǵy taýlardyń da mańyzyn basa aitty.
«Uly aqyn Oljas Súleimenov aitqandai: «Dalany tómendetpei, taýlardy ulyqtaý» qajet. Mine, biz osylai ómir súrip jatyrmyz», - dedi Qasym-Jomart Toqaev.
