Memleket basshysy Premer-Ministrdiń orynbasary – Aýyl sharýashylyǵy ministri Asqar Myrzahmetovti qabyldady, dep habarlaidy "Ult aqparat" Aqordaǵa silteme jasap.
Kezdesýde elimizdiń agroónerkásiptik keshenin damytý baǵdarlamasy arqyly atqarylǵan jumystardyń aralyq nátijeleri jáne ony odan ári iske asyrý jónindegi josparlar talqylandy.
Nursultan Nazarbaev elimizdiń barlyq diqandaryn astyq jinaý naýqanynyń tabysty aiaqtalýymen quttyqtady.
– Jaz ailarynyń basyndaǵy kúrdeli jaǵdaiǵa qaramastan, aýyl eńbekkerleri aitarlyqtai kólemde astyq jinady. Ishki qajettilikti qanaǵattandyrýǵa jáne ónimimizdi eksportqa shyǵarýǵa múmkindik bar. Jalpy, barlyq málimetter oń qarqyndy kórsetip otyr, – dedi Qazaqstan Prezidenti.
Memleket basshysy aýyl sharýashylyǵynyń el ekonomikasyndaǵy mańyzdy róline toqtalyp, osy salaǵa bólingen qarjyny paidalanýdyń tiimdiligi tómen ekenin atap ótti.
– Agrarlyq sektor ekonomikamyzdyń qozǵaýshy kúshi bolyp sanalady. Oǵan memleket kóp qarjy quiyp jatyr. Onyń tiisti qaitarymy bolýǵa tiis edi, biraq, ókinishke qarai, olai bolmai otyr, – dedi Nursultan Nazarbaev.
Sonymen birge, Qazaqstan Prezidenti biylǵy astyq jinaý naýqany joǵary qarqynmen júrgizilgenin aitty.
– Biyl 21,7 million tonna astyq jinalyp, ortasha ónimdilik gektaryna 14,2 tsentnerden boldy. Bul byltyrǵy jylmen salystyrǵanda kóbirek. Belgilengen josparǵa sáikes, biz tutynýshylyq kooperatsiiany damytýmen, tuqymdyq qordy jaqsartýmen jáne mal sharýashylyǵynyń ónimdiligin arttyrýmen ainalystyq, – dedi Elbasy.
Nursultan Nazarbaev aýyl sharýashylyǵy ónimdiliginiń kólemin elimizdiń ǵylymi áleýetin paidalana otyryp arttyrý qajettigine nazar aýdardy.
Asqar Myrzahmetov Qazaqstan Prezidentine agroónerkásiptik keshenniń memlekettik baǵdarlamasy aiasynda aýyl sharýashylyǵynyń 12 basym baǵytyn odan ári damytýdyń arnaiy kartalaryn ázirleý barysy jóninde baiandady.
Sońynda Memleket basshysy birqatar naqty tapsyrma berdi.
.jpeg)