Foto: Úkimet
Premer-ministrdiń birinshi orynbasary Roman Skliardyń tóraǵalyǵymen ishki naryqty munai ónimderimen qamtamasyz etý, otyndy zańsyz áketýdiń jolyn kesý jáne janar-jaǵarmai materialdarynyń ainalymyn tsifrlandyrý máseleleri boiynsha keńes ótti, dep habarlaidy Ult.kz.
Energetika ministrliginiń aqparaty boiynsha, JJM naryǵyndaǵy jaǵdai turaqty, iri munai-óńdeý zaýyttary shtattyq rejimde jumys isteidi, qorlar ishki suranysty qamtamasyz etýge múmkindik beredi.
Sondai-aq elden munai ónimderin zańsyz áketýdiń jolyn kesý jumystary jalǵasýda. Jyl basynan beri keden organdary men Shekara qyzmeti zańsyz áketýge 836 árekettiń jolyn kesti.
Sonymen qatar Qarjy monitoringi agenttigi munai ónimderin kontrabandamen jáne jalǵan óńdeýmen ainalysatyn birqatar uiymdasqan toptar men kompaniialardyń qyzmetin anyqtap, jolyn kesti, bul ister boiynsha jumystar jalǵasýda. Biyl Agenttiktiń óndirisinde 22 qylmystyq is boldy, onda JJM zańsyz ainalymynyń somasy 19 mlrd teńgeni qurady. Shekaranyń negizgi ýchaskelerinde mobildi toptar jumys isteýde, reidtik jáne jedel is-sharalar ótkizilýde.
Jyl basynan bastap Ishki ister ministrligi tiisti ruqsatsyz qaita jabdyqtalǵan kólik quralyn basqarǵany úshin 3 334 júrgizýshini (ÁQBtK 590 babynyń 7 jáne 10 tarmaqtary), onyń ishinde benzin baktaryn benzinge-293, dizel otynyna-108 jáne gaz ballondy jabdyqqa-2 933 qaita jabdyqtaǵany úshin tartty.
Uiymdasqan qylmysqa qarsy kúres bólimsheleri munai ónimderin zańsyz áketýmen ainalysatyn qylmystyq toptardyń qyzmetin anyqtaý jáne jolyn kesý boiynsha jumysty jalǵastyrýda. Jyl basynan beri munai ónimderin urlaý, zańsyz saqtaý jáne tasymaldaý faktileri boiynsha 11 qylmystyq quqyq buzýshylyq anyqtaldy.
Shetelge otyn aǵynyn azaitý maqsatynda munai ónimderiniń jekelegen túrlerin áketýge tyiym salý uzartyldy, kólik quraldarymen shekaradan ótý boiynsha shekteýler engizildi, shekaralyq pýnktterde baqylaý kúsheitildi.
Óńirlerde ákimder orynbasarlarynyń basshylyǵymen munai bazalary men janarmai quiý beketterinde otynnyń bolýyn jáne logistikanyń turaqtylyǵyn baqylaityn shtabtar jumys isteidi.
Keńeste munai bazalaryn munai ónimderiniń ainalymyn esepke alý jáne tsifrlandyrý baqylaý quraldarymen jaraqtandyrýǵa erekshe nazar aýdaryldy. Munai bazalarynyń bir bóligi qazirgi zamanǵy esepke alý júielerimen jabdyqtalǵan jáne naqty ýaqyt rejiminde derekterdi beredi, mundai qurylǵylardy ornatý mindettiligi men olardyń joqtyǵy úshin jaýapkershilikti bekitetin zańnamalyq túzetýler daiyndaldy. Sonymen qatar memlekettik jáne korporativtik aqparattyq júielerdiń integratsiiasy júrgizilýde, bul MÓZ-den túpkilikti iske asyrýǵa deiingi otyn qozǵalysynyń ashyqtyǵyn qamtamasyz etýge múmkindik beredi.
Roman Skliar barlyq sharalar Qazaqstan halqy men ekonomikasynyń qajettilikterin basym qamtamasyz etýge baǵyttalǵanyn atap ótti. Úkimet quqyq qorǵaý jáne baqylaýshy organdarmen birlesip JJM naryǵyn baqylaýdy qatańdatýdy, zańsyz áketýdiń jolyn kesýdi jáne otynnyń ishki naryqqa úzdiksiz jetkizilýin qamtamasyz etýdi jalǵastyrady.
