Qazaqstannyń Kólik ǵylymi-zertteý institýty men Qytaidyń China TransInfo Group kompaniiasy intellektýaldy kólik júieleri men ushqyshsyz tehnologiialar salasynda birlesken quzyret ortalyǵyn qurý týraly kelisimge qol qoidy. Bul týraly Qazaqstannyń Kólik ministrligi habarlady.
Yntymaqtastyqtyń negizgi baǵyttarynyń biri — Qytai men Qazaqstan arasyndaǵy halyqaralyq baǵytta avtonomdy júk tasymalynyń pilottyq jobasyn iske qosý.
Sonymen qatar ortalyq aiasynda kólik quraldarynyń salmaǵy men gabaritterin avtomatty túrde baqylaý júiesin engizý, sonyń ishinde kólik qozǵalysy kezinde salmaq ólsheý tehnologiiasyn paidalaný kózdelgen.
Sondai-aq avtonomdy kólik júrgizýdi synaityn arnaiy poligon salý jáne salalyq aqparattyq júielerdi biriktirip, kólik operatsiialaryn basqarý ortalyǵyn qurý máselesi qarastyrylady.
Ministrliktiń málimdeýinshe, bul bastama Qazaqstannyń intellektýaldy kólik infraqurylymyn damytýǵa, ǵylymi-tehnikalyq áleýetin arttyrýǵa jáne halyqaralyq kólik dálizderine zamanaýi tehnologiialardy engizýge baǵyttalǵan.
