Ánshi Qairat Nurtastyń anasy, kásipker Gúlzira Aidarbekova tanymal tulǵalardyń biznesin synǵa alǵan Nazgúl Sátbaevaǵa narazylyǵyn bildirdi. Ol ózine tiesili dúkenniń tazalyǵy týraly aitylǵan sózderdi joqqa shyǵaryp, kásipkerdi juldyzdardyń atyn paidalanyp tanymal bolýǵa tyrysty dep aiyptady, dep habarlaidy ult.kz.
Eske sala keteiik, osyǵan deiin Ult.kz kásipker ári biznes týraly kitap avtory Nazgúl Sátbaevanyń shoý-biznes ókilderine tiesili kásiporyndar týraly pikirin jariialaǵan edi.
Sátbaeva qazaqstandyq tanymal adamdar ashqan birneshe dúken men sulýlyq salonyna barǵanyn aityp, ondaǵy qyzmet kórsetý deńgeiine kóńili tolmaǵanyn jetkizgen. Ol mysal retinde Gúlzira Aidarbekovanyń dúkenin, Jazira Baiyrbekovanyń salonyn jáne Asha Mataidyń kásibin ataǵan.
Kásipkerdiń pikirinshe, keibir tanymal tulǵalar biznesti damytýda ózderiniń ataǵy men áleýmettik jelidegi aýditoriiasyna arqa súieidi. Al qyzmet kórsetý sapasyn jaqsartý men bilikti mamandardy jumysqa tartý máselesine jetkilikti kóńil bólinbeidi.
Alaida bul pikir Gúlzira Aidarbekovaǵa unamaǵan. Ol óz dúkeniniń tazalyǵyna qatysty aitylǵan synmen kelispei, Nazgúl Sátbaevaǵa jaýap qaitardy.
"Boiaýshy, boiaýshy degenge saqalyn boiapty» degendei, aqylshy bolyp eldi tańǵaldyryp, ataǵy bar adamdardyń artynan sóilep, haip jinap, podpischik kóbeitpei-aq qoishy. Bizdiń dúkenniń tazalyǵyndai dúken ashyp, jasap kór aldymen. Osy min izdep, tyrnaq astynan kir taýyp otyratyndardan qaldyq qoi", – dedi Gúlzira Aidarbekova.
Sondai-aq ol Nazgúl Sátbaevany ózgelerdiń kásibinen kemshilik izdeýdiń ornyna óz jetistikterin nemese anasynyń kásipkerlik tájiribesin úlgi etýge shaqyrdy.
Gúlzira Aidarbekovanyń bul sózine Nazgúl Sátbaeva da únsiz qalmady. Ol eshkimdi ádeii qaralaýdy kózdemegenin aityp, óziniń pikirin túsindirdi. Sátbaevanyń sózinshe, aitylǵan syn óner adamdarynyń shyǵarmashylyǵyna nemese jeke basyna emes, olardyń kásipkerlik qyzmetine qatysty bolǵan.
Osylaisha, kásipkerdiń qyzmet kórsetý sapasy týraly pikiri eki taraptyń arasyndaǵy ashyq pikirtalasqa ulasty.
Aita keteiik, Nazgúl Sátbaevanyń dúkender men salondardyń tazalyǵy jáne qyzmet kórsetý sapasyna qatysty aitqandary onyń jeke baǵasy bolyp sanalady. Bul málimdemeler táýelsiz tekseris nátijesimen rastalǵany týraly aqparat keltirilmegen.
