Búgin Ońtústik Qazaqstan oblysyna arnaiy saparmen kelgen Qazaqstan Respýblikasynyń Premer-Ministri Baqytjan Saǵyntaev Saryaǵash aýdanynda bolyp, ondaǵy agrarlyq-ónerkásiptik keshen damytý baǵdarlamasynyń júzege asyrylýymen jáne innovatsiialyq tehnologiialardy qoldanatyn sharýa qojalyqtarynyń jumysymen tanysty, dep habarlaidy "Ult aqparat".
Úkimet basshysy osy aýdandaǵy «Keles» JShS-niń plenka jáne kóshet qondyrýǵa arnalǵan ydys shyǵaratyn óndiristik tsehyn aralap kórdi. Jobanyń jalpy quny 150 mln teńgeni qurasa, onyń 23 mln teńgesi nesiege alynǵan. Iske qosylǵanyna bir-aq ai bolǵan tsehta jylyjaiǵa arnalǵan jabdyqtar shyǵarylady.
Munan soń Baqytjan Saǵyntaev «Jabai ata» sharýa qojalyǵyna atbasyn burdy. Bul qojalyq jabyq topyraq jaǵdaiynda sapaly qyzanaq sortyn jyl mezgiliniń kúzgi-qysqy jáne erte kóktemgi ýaqytta zamanaýi tehnologiiany paidalana otyryp óndiretin sharýashylyq bolyp tabylady. 2009 jyly qurylǵan qojalyqta búginge 20 gektar sýarmaly jeri bar. Jobanyń quny 1,8 mlrd teńgeni quraidy. Munda jylyna 2250 tonna qyzanaq pen qiiar ónimderi óndiriledi. Óndirilgen ónimniń 60 paiyzy ishki naryqty qamtysa, 40 paiyzy Resei Federatsiiasyna eksporttalady.
Aita keteiik, búginde oblystaǵy jylyjaidyń jalpy kólemi 1 325 gektarǵa jetken. Onyń 95,5 gektary ónerkásiptik, 1229,1 gektary fermerlik jylyjai sanalady. Iaǵni, elimizdegi jylyjailardyń 84 paiyz úlesi Ońtústik Qazaqstan oblysyna tiesili. 2017 jyly óńirdegi jylyjailardan 174 myń tonna kókónis ónimderi alynǵan. Atap aitqanda, 104,4 myń tonna qiiar, 69,6 myń tonna qyzanaq óndirildi. Aǵymdaǵy jyly óńirde 214 gektar jylyjai salý josparlanýda.
Úkimet basshysy sapar barysynda «Saryaǵash jer syiy» JShS-niń tuqymbaǵyna da aialdady. Sharýa qojalyǵynyń basshysy Tanabai Shyntasov Baqytjan Saǵyntaevqa sýarmaly eginshilikte jańa tehnologiialardyń qoldanylýy týraly áńgimelep berdi. 2002 jyly qurylǵan bul sharýashylyqtaǵy sýarmaly jer kólemi 96,5 gektardy quraidy. Munda búginde 200 myń dana jemis pen 700 myń dana júzim kósheti jáne elitalyq dekorativtik aǵash kóshetteri ósirilýde. Óndirilgen ónimniń 60 paiyzy ishki naryqty qamtysa, 40 paiyzy Qyrǵyzstan jáne Ózbekstan Respýblikalaryna eksporttalýda. Jylyna 100 mln teńgeniń ónimin óndiretin qojalyqta 48 adam jumyspen qamtylǵan.
Budan keiin QR Premer-Ministri tuqymbaqta aýyl sharýashylyǵy taýaróndirýshilerimen arnaiy jiyn ótkizdi. Shara barysynda AÓK damytý boiynsha Aýyl sharýashylyǵy ministriniń birinshi orynbasary Arman Evniev baiandama jasady. Sondai-aq, jiynda «Qazagro» Ulttyq kompaniiasynyń basqarma tóraǵasy Nurlybek Malelov nesielendirý jóninde baiandady.
Búginde óńirde 8 elitalyq kóshet óndiretin sharýashylyq bar. Segiz kóshetbaqta óndirilgen jemistiń kóshet sany 2746,5 myń dana bolsa, 3469 myń danasy júzim kósheti sanalady. Atalǵan segiz kóshetbaqtyń beseýi Saryaǵash aýdanynda ornalasqan. Al, Maqtaral men Qazyǵurt aýdanynda jáne Shymkent qalasynda 1 mln 399 myń dana jemis pen 743 myń dana júzim kósheti óndirilýde. Óndirilgen orta boily jemis kóshetteri 2,4 myń gektar alqapqa, 3469 myń dana júzim 2 myń gektarǵa egýge jetedi.
Qazirgi tańda oblysta ónim berý jasyndaǵy 15 myń gektar jemis bar. Onyń 1,404 myń gektary Saryaǵash aýdanynda jaiqalyp tur. Al, «Saryaǵash jer syiy» JShS-de ósip turǵan jemister gektaryna 80 tsentnerge deiin ónim berýge qaýqarly. Aýdandaǵy jemister gektaryna 50,7 tsentnerden ónim bere alady. Byltyrǵy jyly óńirde jalpy alynǵan jemis óniminiń kólemi 86,2 myń tonnaǵa jetken.
