Búgin QR Ortalyq sailaý komissiiasynyń otyrysynda 2021 jylǵy 10 qańtarǵa taǵaiyndalǵan Qazaqstan Respýblikasy Parlamenti Májilisi jáne máslihattary depýtattarynyń kezekti sailaýynda daýys berý quqyǵyn beretin esepten shyǵarý kýálikteri týraly másele qaraldy, dep habarlaidy "Ult aqparat".
Kún tártibindegi osy taqyryp boiynsha Ortsailaýkom tóraǵasynyń orynbasary Konstantin Petrov baiandama jasady. Ol sailaý zańnamasyna sáikes, sailaýshy óziniń bolatyn jerin aýystyrǵan kezde biylǵy 26 jeltoqsannan bastap 2021 jylǵy 9 qańtardaǵy saǵat 18:00-ge deiin daýys berý quqyǵyn beretin esepten shyǵarý kýáligin alýǵa quqyly ekenin habarlady.
Esepten shyǵarý kýáligin tiisti sailaý komissiiasy ótinish pen jeke kýálikti usyný negizinde beredi. Daýys berý quqyǵyn beretin esepten shyǵarý kýáligin kórsetken kezde ýchaskelik sailaý komissiiasy daýys beretin kúni sailaýshyny onyń bolatyn jeri boiynsha sailaý ýchaskesindegi sailaýshylar tizimine engizedi. Sailaýshynyń esepten shyǵarý kýáligin alýǵa bergen ótinishi sailaýshylar tizimine qosa beriledi jáne ony tiisti sailaý ýchaskesi boiynsha sailaýshylar tiziminen shyǵarý úshin negiz bolyp sanalady. Joǵalyp qalǵan esepten shyǵarý kýálikteri qalpyna keltirilmeidi, sondai-aq olardyń telnusqalary berilmeidi.
OSK málimetine qaraǵanda, sailaýshy, eger esepten shyǵarý kýáligi bir eldi mekenniń shegindegi basqa sailaý ýchaskesinde berilgen bolsa, sailaýshylardyń tizimine engizilmeidi. Eger esepten shyǵarý kýáligin basqa sailaý okrýginiń ýchaskelik sailaý komissiiasy berse, sailaýshy oblystyq, qalalyq, aýdandyq máslihat depýtattaryn sailaý kezinde daýys berýge arnalǵan biýlletenderdi almaidy.
Sailaýshy esepten shyǵarý kýálikteriniń ár túrli sanyn ala alady jáne ol turǵan jeri boiynsha sol jerdegi sailaý okrýgteriniń sheginde jaramdy esepten shyǵarý kýálikteriniń sanyna teń sailaý biýlletenderiniń sanyn alady.
Máselen, sailaýshy oblystyń bir aýdanynyń sheginde óziniń bolatyn ornyn aýystyrǵan kezde, sailaýshy Parlament Májilisiniń, oblystyq máslihattyń jáne aýdandyq máslihattyń depýtattaryn sailaýǵa qatysa alady jáne tiisinshe bolatyn jerinde úsh esepten shyǵarý kýáliginiń ornyna – úsh sailaý biýlletenin alady.
Sailaýshy óziniń bir oblys (biraq basqa aýdan, qala) sheginde bolatyn ornyn aýystyrǵan kezde, ol Parlament Májilisi men oblystyq máslihat depýtattaryn sailaýǵa qatysady jáne tiisinshe bolatyn jerinde eki esepten shyǵarý kýáliginiń ornyna – eki sailaý biýlletenin alady. Oblystan tys jerlerde sailaýshy Parlament Májilisi depýtattarynyń sailaýyna qatysady jáne tiisinshe bolatyn jerinde bir esepten shyǵarý kýáliginiń ornyna – bir sailaý biýlletenin alady.
Berilgen esepten shyǵarý kýálikterin esepke alýdy jetildirý maqsatynda bir mezgilde birneshe sailaý ótkizgen kezde, Ortalyq sailaý komissiiasy sailaýdyń árbir túri boiynsha esepten shyǵarý kýáliginiń ártúrli túsin belgileidi, árbir esepten shyǵarý kýáliginde sailaý naýqanynyń ataýy kórsetiledi.
Birinshi máseleni qaraý qorytyndysyn shyǵara otyryp, QR Ortalyq sailaý komissiiasynyń tóraǵasy Berik Imashev sailaýshylardy quqyqtyq belsendilik tanytýǵa, óziniń belsendi sailaý quqyǵyn iske asyrý úshin zańdyq máni bar is-áreketterdi júzege asyrýǵa shaqyrdy.
