«QR Mádeniet jáne sport vitse-ministri Serik Jarasbaev fristaildan ulttyq quramanyń burynǵy sportshysynyń óz bapkerin sybailas jemqorlyq jasady dep aiyptaǵany týraly suraqtarǵa jaýap berdi, dep habarlaidy QazAqparat.
2021 jyldyń qazan aiynda fristaildan ulttyq quramanyń burynǵy sportshysy Aleksandr Gebert óz bapkerin alym-salyq jinady, biliksizdik tanytty jáne quramadan zańsyz shyǵardy dep aiyptaǵan edi.
«Iá, fristail-mogýl quramasynda mundai jaǵdai boldy. Búginde osy másele boiynsha resmi ýákiletti organdar tekserý júrgizdi jáne sybailas jemqorlyq boiynsha esh quqyqbuzýshylyq bolmaǵanyn anyqtady. Árine, kóptegen sportshylar belgili bir dárejede óz narazylyqtaryn bildirýde bas jattyqtyrýshylardy nemese qasyndaǵy jattyqtyrýshylardy kinálai bastaidy. Bul oqiǵadaǵy bas jattyqtyrýshy Elena Krýhlyhinany fristail-mogýldaǵy eń jaqsy mamandardyń biri ekenin aitqym keledi. Muny sporttyq printsip boiynsha da dáleldeý ońai, ol - Olimpiada oiyndarynyń jalǵyz júldegerin daiyndaǵan adam. Ony qandai da bir nárse úshin kinálaý durys bolmas edi», - dedi vitse-ministr Ortalyq kommýnikatsiialar qyzmetinde ótken baspasóz máslihatynda.
Spikerdiń aitýynsha, memlekettik organdar óz ýaqytynda máselege taldaý jasady jáne tiisti qorytyndysyn berdi.
«2018 jyly Mádeniet jáne sport ministrligi sybailas jemqorlyq táýekelderin boldyrmaý úshin Sybailas jemqorlyqqa qarsy qyzmetpen jáne Olimpiada komitetimen birlesip, bas jattyqtyrýshynyń esh qarjylyq operatsiia jasamaityny, bárin Olimpiada komitetiniń qyzmetteri arqyly júrgizý sheshimin qabyldady. Mysaly, qonaq úi úshin tólem qolma-qol aqshasyz birden tólenedi. Sportshylardyń tamaqtanýy men kúndelikti júrip-turýyna kelsek, qarajat ár sportshynyń kartasyna jeke túsedi. Sporttyq fýnktsioner retinde bul sybailas jemqorlyq táýekelderin boldyrmaý úshin úlken jetistik jáne mańyzdy qadam dep sanaimyn. Bolashaqta biz sybailas jemqorlyq táýekelderiniń aldyn alý boiynsha osy jumysty jalǵastyrýǵa niettimiz», - dep atap ótti Serik Jarasbaev.
