QR Mádeniet jáne sport vitse-ministri Órken Bisaqaev mońǵoliialyq kásipker Jandos Qońtarbaimen kezdesti, dep habarlaidy "Ult aqparat".
Atalǵan ministrlik málimetinshe, «Kazakh Tourism» UK AQ shaqyrýymen arnaiy kelgen mońǵoliialyq kásipkermen kezdesý barysynda Qazaqstanda etno jáne ekotýrizmdi damytý joldary talqylandy. Salanyń qyr-syryna qanyq kásipker óziniń jumys tájiribesimen bólisýge daiyn ekenin bildirdi. Atap aitqanda, qorshaǵan ortaǵa ziian keltirmei, ańshylyq-saiatshylyq týrizmdi jolǵa qoiýdyń zańdyq-quqyqtyq tetikterine keńinen toqtaldy.
Jalpy, tórt jyldyń ishinde óz isin órbitken Jandos Qońtarbaidyń aitýynsha, sheteldik týristerdiń elimizge degen qyzyǵýshylyǵy joǵary. Osyǵan orai, qandas kásipker etnotýrizmdi damytý boiynsha birlese qyzmet atqarýdy usynyp otyr. Óz kezeginde, Mádeniet jáne sport vitse-ministri eldegi ishki jáne syrtqy týrizmdi damytýǵa Úkimet tarapynan úlken mán berilip jatqanyn atap ótti. Órken Serikqaliuly kásipkerge alǵysyn bildire otyryp, Baian-Ólgeide jolǵa qoiylǵan tájiribeniń tiimdi tustaryn elimizge engizý maqsatynda tiisti qoldaý kórsetýge ázir ekendigin bildirdi.
Kezdesý sońynda taraptar aldaǵy ýaqytta bas qosyp, Qazaqstanǵa týristerdi tartýdyń naqty tetikterin belgileýge ýádelesti. Oǵan deiin Jandos Qońtarbai Qazaqstandaǵy etnotýrizmdi damytýǵa qolaily aimaqtardy baǵamdap, jergilikti turǵyndarmen kezdesý ótkizetin bolyp sheshildi.
Qazirgi tańda etnotýrizmniń bilikti mamanyna ainalǵan Jandos Qońtarbai atamekeninde de osy salany damytýǵa atsalyspaq niette.
«Qazaqstan Prezidenti Qasym-Jomart Toqaev halyqqa joldaýynda aýyl-aimaqta eko jáne etnotýrizmdi damytýdy tapsyrǵan bolatyn. Ásirese, aýyldaǵy aǵaiynǵa týrizmdi kásip kózi retinde qarastyrýdy eskertti. Jer júzin sharlaityn saiahatshylardy elimizdiń tumsa tabiǵaty men bai mádeni murasy erekshe qyzyqtyratyny belgili. Sol sebepti, týristerge sapaly servistik qyzmetti usyna otyryp, jer-jahanǵa elimizdiń týristik áleýetin ilgeriletýdiń mańyzy zor. Sonymen qatar, ulan baitaq jerimizdegi ishki týrizdi damytý da qazynaǵa qarjy tartýdyń birden–bir joly sanalady», - dedi ministrlikten.
Esterińizge sala ketsek, AQSh Prezidentiniń uly kishi Donald Tramp Mońǵoliiada qazaq kiiz úiine qonyp, demalysyn ótkizip qaitqanyn Instagram-daǵy paraqshasynda jazǵan edi. Sondai-aq Kishi Donald Tramppen birge túsken fotosýretterdi júktegen Jandos Qońtarbai Aqat esimdi Mońǵoliia qazaǵy amerikalyq meimandardyń saiahat kezinde baqtashylardyń úlken tobyna baryp, kóshpeli ómirmen tanysqanyn atap ótken bolatyn.
