Qorǵanys ministrliginde 2019 jyldyń qorytyndysy boiynsha Armiia ortalyq sport klýbynyń áskeri sportshylaryna qurmet kórsetý rásimi ótti, dep habarlaidy "Ult aqparat" ministrliktiń baspasóz qyzmetine silteme jasap.
Jyl boiy halyqaralyq jarystarǵa qatysyp, baq synaǵan áskeri sportshylarǵa merziminen buryn áskeri ataqtar, nagradalar, syilyqaqylar men alǵys hattar tabystaldy.
«Qazaqstannyń áskeri sporty jyldan jylǵa belsendi túrde jetistikterin arttyrýda. Bizdiń áskeri qyzmetshiler tuǵyrdan túspei, rekordtar jańartyp keledi. Barlyq sáttilikterdiń Qarýly kúshterimizben bailanysty bolǵanyn qalar edim. Halyqaralyq jarystarda el namysyn qorǵap júrsizder. Sonymen qatar osy halyqaralyq jarystarda da bári Sizderdiń Qarýly kúshterdiń tárbielenýshileri ekenderińizdi bilýge tiis», - dedi QR Qorǵanys ministri Nurlan Ermekbaev sportshylarǵa arnaǵan sózinde. Sonymen qatar, ministr olarǵa sarqylmas qýat pen jańa jeńister tiledi.
Sportshylar arasynda alǵyspen atap ótkenderdiń biri – QR QK qyzmetkeri Jandos Madehiianov boldy. Ol 2019 jylǵy jastar arasynda ótken qoian-qoltyq kúresten álem chempiony atandy.
«Bala kúnimnen sport pen áskeri ortaǵa degen qyzyǵýshylyǵym boldy. Biz túrli jarystarǵa qatystyq. Osy jylǵy eńbegimniń baǵalanǵanyna qýanyshtymyn. Meniń jetistikterim marapatqa ie bolyp, joǵary baǵalandy», - dep sportshy atap ótti.
Budan ózge, halyqaralyq sanattaǵy qazy maior Amanjol Rahmetovqa merziminen buryn «podpolkovnik» áskeri ataǵy berildi. Halyqaralyq sanattaǵy qazy mártebesin alǵan maior Erkebulan Túsiphanov «Halyqaralyq yntymaqtastyqqa úlesi qosqany úshin» medalimen marapattaldy.
Olimpiada chempiony, Qytaida ótken Búkilálemdik áskeri oiyndarynyń jeńimpazy, jeńil atletshi maior Olga Rypakovaǵa, halyqaralyq sanattaǵy sport sheberi, QR bes dúrkin chempiony, boksshy Temirtas Júsipovke jáne Aziia júldegeri, Búkilálemdik boks (WSB) seriiasy boiynsha eki márte chempion atanǵan Aslanbek Shynbergenovke, taekvondodan Aziia chempionaty men Aziia oiyndarynyń kúmis júldegeri kishi serjant Rýslan Japarovqa syiaqy berildi.
Sonymen qatar, V Halyqaralyq qoian-qoltyq kúresiniń týrniri men QR Tuńǵysh Prezidenti kýbogyna ótken armiianyń qoian-qoltyq kúresiniń jeńimpazy qatardaǵy jaýynger Sora Rahmonova alǵys hat aldy. AOSK-nyń jattyqtyrýshysy kapitan Oljas Aqbaevqa gramota berildi.
Aita keterligi, 2019 jyldyń basynan bastap QR Qorǵanys ministrliginiń Armiia ortalyq sport klýby – Sport komitetiniń shtattyq komandalarynan 100-den astam áskeri qyzmetshi men azamattyq personal respýblikalyq jáne halyqaralyq deńgeidegi 110 sporttyq is-sharaǵa qatysyp, ár túrli dárejedegi 250-den astam medal jeńip aldy. 2019 jyly áskeri sporttaǵy mańyzdy oqiǵa Qytaida ótken VII Búkilálemdik áskeri oiyndar boldy. Qazaqstannyń qurama komandasy 109 qatysýshy el jáne 9 myń áskeri qyzmetshi arasynan 12-shi oryndy ielendi. El qorjynynda – 4 altyn, 3 kúmis jáne 5 qola medal bar.
