Ishki ister ministriniń orynbasary Iýrii Ilin Ortalyq kommýnikatsiialar qyzmetinde ótken baspasóz máslihatynda el óńirlerindegi sý tasqynyna qatysty jaǵdaidy baiandady, dep habarlaidy QazAqparat tilshisi.
«Keibir aimaqtarda jańbyr molynan jaýǵanymen, sý tasqyny boiynsha jaǵdai turaqty. Dál qazirgi ýaqytta turǵylyqty eldimekenderdi sý basý qaýpi joq. Jalpy, taldaý jumystaryna súiene otyryp aitar bolsaq, Túrkistan, Jambyl oblystary ótken aptada daiyndyq kúiine keltirilip, qosymsha bólimsheler jiberildi. Aqmola, Qyzylorda jáne Soltústik Qazaqstan oblystaryndaǵy toptardyń jumysyn kúsheitý úshin ortalyq qutqarý jasaǵynyń qyzmetkerleri jóneltildi», - dedi Iýrii Ilin.
Vitse-ministr sondai-aq Aqmola oblysynyń Býrabai aýdanynda aǵyndy sý buzyp ketken Kenesary bógetine qatysty aitty.
«Atalmysh gidrotehnikalyq nysannyń qujat boiynsha syiymdylyq kólemi 500 myń tekshe metrdi quraidy. Atalmysh bógetten tasyp aqqan sý Han ózenine baryp quiǵan. Iaǵni, Han ózeni sýdyń basym aýqymyn qabyldap, Ivanov sý qoimasyn jarylyp ketýden saqtap tur. Ivanov sý qoimasynyń mańynda Ivanovo eldi mekeni bar. Kókshetaý qalasy men Ivanovo eldi mekenin qazirgi ýaqytta sý basý qaýpi joq. Demek, ózenniń qalypqa túsken arnasy atalmysh aýmaqpen sýdyń aǵyp ketýine jaǵdai jasaýda», - dedi ol.
Iýrii Ilinniń sózine sensek, Soltústik Qazaqstandaǵy Sileti sý qoimasyna erekshe nazar aýdarylyp otyr.
«Sebebi, demalys kúnderi aýa temperatýrasynyń kóterilýine bailanysty atalmysh sý qoimasyna sý qalyptan tys kóp aǵyp kelýde. SQO aýmaǵyndaǵy birqatar turǵylyqty eldi mekende belgili bir qaýiptiń sheti bar. Qazirgi ýaqytta kúsheitilgen toptar eki eldi meken boiynsha jumys júrgizip jatyr. Olar evakýatsiialanatyn qaýipsiz jerler belgilenýde», - deidi vitse-ministr.
IIM orynbasary sondai-aq, Qaraǵandy oblysynda qardyń jyldam erýiniń saldarynan birqatar avtokólik joldaryn sý basqanyn habarlady.
«Degenmen, turǵyn úilerdi sý basqan joq. Qazirgi ýaqytta jaǵdai turaqty. Nura ózeni basseini boiynsha sýdy jiberý qýattylyǵy sekýndyna 600 tekshe metrdi quraidy. Bul rette, buryn qolǵa alynǵan jumystardy esepke ala otyryp, sý deńgeii million tekshe metrge deiin bolsa da, turǵylyqty eldi mekenderdiń jaǵdaiyna qaýip týǵyzbaitynyn aita alamyz», - deidi ol.
