«Ábý-Dabi Plaza» aýmaǵyndaǵy janjalǵa bailanysty qylmystyq is qozǵaldy. Bul týraly QR IIM Memlekettik til jáne aqparat departamentiniń direktory Almas Sadýbaev málim etti, dep habarlaidy Ult.kz tilshisi QazAqparat agenttigine silteme jasap.
«2 qyrkúiek kúni salynyp jatqan «Ábý-Dabi Plaza» nysany aýmaǵynda oryn alǵan oqiǵaǵa bailanysty QR Ishki ister ministrligi qosymsha mynany habarlaidy: Astana qalalyq Ishki ister departamenti QR Qylmystyq kodeksiniń 293-baby 2-tarmaǵy (buzaqylyq) boiynsha tirkelgen qylmystyq is aiasynda júrgizilgen jedel tergeý sharalarynyń nátijesinde kúzet firmasynyń qyzmetkeri Polatovqa dene jaraqatyn salýǵa qatysqan kúdiktiler anyqtaldy. Polatovtyń soqqyǵa jyǵylýyna qarymta jaýap retinde qurylys nysanynyń jumysshysy Úndistan azamatyn soqqyǵa jyǵýǵa qatysqan kúzet qurylymynyń qyzmetkerlerinen kúdiktiler de anyqtaldy», - dedi ol.
Onyń aitýynsha, qazirgi ýaqytta atalǵan is boiynsha janjalǵa qatysýshylardyń is-áreketin naqtylaýǵa baǵyttalǵan qajetti tergeý amaldary júrgizilip jatyr. Onyń nátijesine sáikes qylmystyq zań boiynsha quqyqtyq baǵa berilip, kináliler jaýapkershilikke tartylatyn bolady.
«Buǵan qosa, Astana qalasynyń ishki ister organdary «Ábý-Dabi Plaza» aýmaǵyndaǵy janjaldyń jolyn kesý barysynda 3 qyrkúiek kúni túnde qoǵamdyq tártipti buzýǵa jol bergen azamattarǵa qatysty sharalar qabyldady. Politsiia bólimshesine jetkizilgen 41 adamnyń 8-i ákimshilik jaýapkershilikke tartyldy. Qalǵandary túsindirý jumystary júrgizilip, qoǵamdyq tártipti buzýǵa jol bermeý týraly eskertýden keiin bosatyldy. QR IIM elorda turǵyndary men qonaqtaryn qoǵamdyq tártipti buzýǵa baǵyttalǵan zańǵa qaishy is-áreketke barmaýǵa, sonymen qatar bolǵan oqiǵaǵa bailanysty jalǵan aqparattardy taratpaýdy eskertedi. Joǵaryda atalǵan jaittar oryn alǵan jaǵdaida kináliler zańmen belgilengen jaýapkershilikke tartylady», - dedi Almas Sadýbaev.
