Búgin Densaýlyq saqtaý ministrligi QR Sybailas jemqorlyqqa qarsy is-qimyl agenttigimen birge sybailas jemqorlyq táýekelderine syrtqy taldaý júrgizý boiynsha keńes ótkizdi.
Birinshi vitse-ministr Marat Shoranovtyń tóraǵalyǵymen ótken jiynǵa ministrliktiń barlyq qurylymdyq bólimsheleriniń basshylary qatysty, dep habarlaidy "Ult aqparat" QR Densaýlyq saqtaý ministrliginiń baspasóz qyzmetiniń málimetterine silteme jasap.
M.Shoranov atap ótkendei, densaýlyq saqtaýdy damytý - memlekettiń áleýmettik saiasatynyń negizgi basymdyqtarynyń biri. Halyqtyń ál-aýqatyn jaqsartýdyń biri retinde meditsina qyzmetteriniń qoljetimdiligi men sapasyna erekshe nazar aýdarý mańyzdy.
«Pandemiia búkil densaýlyq saqtaý júiesiniń kúshin synaýda jáne bizdiń qyzmetimizge aitarlyqtai túzetýler engizdi. Jumys barysyndaǵy keibir protsesterdiń jetilmegendigin, solardyń ishinde sybailas jemqorlyq komponentterin, jyldar boiy jinaqtalǵan problemalardy ashty», - dedi birinshi vitse-ministr.
Aǵymdaǵy jyldyń 2 qazanynda Densaýlyq saqtaý júiesindegi sybailas jemqorlyqqa qarsy is-qimyl máseleleri boiynsha ministrliktiń Sybailas jemqorlyqqa qarsy kúres qyzmetimen birlesken otyrysy barysynda Densaýlyq saqtaý ministri Aleksei Tsoi departament júrgizip jatqan jumystar týraly aityp, sybailas jemqorlyq táýekelderin anyqtaý jáne joiý boiynsha syndarly yntymaqtastyqqa daiyn ekenin bildirgen edi. Sondai-aq, ministr ortalyq apparattaǵy sybailas jemqorlyq táýekelderine syrtqy taldaý júrgizýdi bastaǵanyn aitqan bolatyn. Sonymen birge Agenttiktiń tóraǵasy Alik Shpekbaev bul bastamany qoldaǵan. Aldaǵy ýaqytta osyndai jumystar ministrliktiń jańadan qurylǵan komitetteri men aýmaqtyq departamentterinde júrgiziledi.
«Aǵymdaǵy jyldyń 16 qarashasynda Birlesken buiryqqa qol qoiyldy, sonyń aiasynda jumys toby ministrliktiń uiymdastyrýshylyq-basqarýshylyq qyzmeti men normativtik quqyqtyq aktilerindegi 2020 jylǵy 17 qarashadan 20 jeltoqsanǵa deiin sybailas jemqorlyq táýekelderine taldaý júrgizedi», - dedi M.Shoranov.
Sonymen birge, Sybailas jemqorlyqqa qarsy qyzmet «SK-Farmatsiia» jáne áleýmettik meditsinalyq saqtandyrý qorynyń sybailas jemqorlyq táýekelderine syrtqy taldaý júrgizdi. Qazir kemshilikterdi joiý jumystary jalǵasýda.
«Ministrlik densaýlyq saqtaý júiesindegi sybailas jemqorlyq faktilerin aldyn alý úshin ashyqtyq jáne obektivtilikti basshylyqqa alady. Sonymen qatar, biz jańa birlesken jobalardy júzege asyrýǵa daiynbyz», - dedi birinshi vitse-ministr.
Jalpy, keńeske qatysýshylar Densaýlyq saqtaý ministrliginiń qyzmetimen jáne qurylymdyq bólimsheleriniń basshylarymen tanysyp, syrtqy taldaý júrgizýdiń uiymdastyrýshylyq máselelerin talqylady.
