"Qazaqstan Respýblikasynyń Din isteri jáne azamattyq qoǵam ministrligi qurylady", - dep habarlaidy Aqordanyń baspasóz qyzmeti.
Qazaqstan Respýblikasy Konstitýtsiiasynyń 44-babynyń 3) tarmaqshasyna sáikes memlekettik basqarý júiesin jańǵyrtý jáne onyń tiimdiligin arttyrý maqsatynda qaýly etemin:
1. Qazaqstan Respýblikasynyń Din isteri jáne azamattyq qoǵam ministrligi, oǵan:
Qazaqstan Respýblikasynyń Mádeniet jáne sport ministrliginen – dini birlestiktermen ózara is-qimyl, dini senim bostandyǵyna azamattardyń quqyqtaryn qamtamasyz etý, sondai-aq memleket pen azamattyq sektordyń ózara is-qimyly salalaryndaǵy;
Qazaqstan Respýblikasynyń Bilim jáne ǵylym ministrliginen – jastar saiasaty salasyndaǵy fýnktsiialary men ókilettikteri berile otyryp, qurylsyn.
2. Qazaqstan Respýblikasynyń Úkimeti:
1) Qazaqstan Respýblikasynyń Prezidenti Ákimshiligimen kelisý boiynsha qaita uiymdastyrylatyn jáne qurylǵan memlekettik organdardyń shtat sanyn qaita bólýdi;
2) osy Jarlyqtan týyndaityn ózge de sharalar qabyldaýdy qamtamasyz etsin.
3. «Qazaqstan Respýblikasy Úkimetiniń qurylymy týraly» Qazaqstan Respýblikasy Prezidentiniń 1999 jylǵy 22 qańtardaǵy № 6 Jarlyǵyna mynadai tolyqtyrý engizilsin:
1-tarmaqta:
«Qazaqstan Respýblikasynyń Bilim jáne ǵylym ministrligi;» degen joldan keiin mynadai mazmundaǵy jolmen tolyqtyrylsyn:
«Qazaqstan Respýblikasynyń Din isteri jáne azamattyq qoǵam ministrligi;».
4. Osy Jarlyqtyń oryndalýyn baqylaý Qazaqstan Respýblikasy Prezidentiniń Ákimshiligine júktelsin.
5. Osy Jarlyq qol qoiylǵan kúninen bastap qoldanysqa engiziledi.
Qazaqstan Respýblikasynyń
Prezidenti N.Nazarbaev
Astana, Aqorda, 2016 jylǵy 13 qyrkúiek
№ 329
