QR Densaýlyq saqtaý ministri Eljan Birtanov meningokokk virýsyna qarsy kúres boiynsha júrgizilip jatqan is-sharalar tiimdiligin baǵalaý maqsatynda Almaty qalasy men Almaty oblysyna issaparǵa shyǵady, dep habarlaidy QazAqparat tilshisi.
«Bekitilip, júrgizilip jatqan is-sharalar tiimdiligin baǵalaý maqsatynda búgin Almaty qalasy men Almaty oblysyna issaparǵa shyǵýdy josparlap otyrmyn. Issapar qorytyndysy boiynsha, qajet bolǵan jaǵdaida qabyldanatyn sharalarǵa ózgerister enedi», - dedi QR Densaýlyq saqtaý ministri Eljan Birtanov búgingi Úkimet otyrysynda.
Ministrdiń aitýynsha, 2018 jyldyń basynan beri ólim qaýpi joǵary bakteriialyq meningokokk infektsiiasy kúdigimen 593 adam qaralǵan jáne 213 adam emdeýge jatqyzylǵan. Olardyń arasynda 58 naýqastan meningokokk infektsiiasy rastaldy. Naýqastar arasynda 14 jasqa deiingi balalar sany - 21. Búginge deiin on adam emdep shyǵaryldy jáne 55 naýqas em alyp jatyr.
«Atalǵan syrqattan 13 adam qaitys boldy: Almaty oblysynda - 4, Qyzylorda oblysynda - 1, OQO - 2, Almaty qalasy - 6 adam. Ókinishke qarai, qaitys bolǵandar arasynda alty bala bar», - dedi ministr.
Sondai-aq, ol meningitpen kúres boiynsha arnaiy shtab qurylǵanyn habarlap, Premer-Ministrden shtab jumysyna kómek berýdi surady.
«Qurmetti Baqytjan Ábdiruly, oblys ákimderine, densaýlyq saqtaý basqarmalarynyń óńirlik shtabtarynyń tiisti jumysyn jáne bekitilgen respýblikalyq shtabtyń josparyn, tapsyrmalaryn múltiksiz oryndaýdy qamtamasyz etýdi suraimyn. Sonymen birge, QR Jedel meditsinalyq kómek kórsetý týraly qaǵidalaryn bekitý týraly №450 buiryqqa sáikes, kezek kúttirmeitin jaǵdailar kezinde meditsinalyq kómek jaqyn jerdegi meditsinalyq uiymda kórsetilýi tiis. Oblystardyń emdeýge jatqyzý tártibi týraly barlyq buiryqtardy Densaýlyq saqtaý ministrliginiń buiryqtaryna sáikes keltirilýi tiis», - dedi ministr.
