Elimizdiń Bilim jáne ǵylym ministrligi Arys qalasynda joǵalǵan myńǵa tarta balanyń ata-anasyna tapsyrylǵanyn resmi túrde habarlady.
Ministrliktiń facebook áleýmettik jelisinde taǵy 14 balanyń ata-anasy izdestirilip jatqany málim bolǵan, dep habarlaidy "Ult aqparat".
Ministrliktiń málimetinshe, bilim berý basqarmasy jáne qoǵamdyq uiym ókilderiniń ishinen mobildi toptar 945 balany taýyp, ata-analaryna tapsyrǵan. Bul - 24 maýsym kúni túngi saǵat 23:00-ge deiingi jaǵdai boiynsha berilgen aqparat. Sondai-aq, evakýatsiialanǵan balalar úshin psihologiialyq qoldaýdy, meditsinalyq súiemeldeýdi, bos ýaqytty ótkizý sharalaryn uiymdastyrýdy kózdeitin is-sharalar kestesi ázirlengeni belgili boldy. Ministrlik ókilderi Shymkent qalasy men Túrkistan oblysynyń jergilikti atqarýshy organdarymen birlesip, Arys qalasyndaǵy oqiǵalardy muqiiat qadaǵalaýda. Balalardy qaladan kóshirýge jáne olardy jailastyrýǵa belsendi túrde atsalysyp jatyr.
«Shymkent qalasyna QR BǴM Balalardyń quqyqtaryn qorǵaý komitetiniń tóraǵasy Erjan Ersaiynov pen QR Bilim jáne ǵylym ministriniń balalardyń quqyqtary máseleleri jónindegi keńesshisi Raisa Sher jiberildi. Oqiǵa ornynda jedel toptar jumys istep jatyr. Qazirgi ýaqytta QR BǴM ókilderi jergilikti atqarýshy organdarmen birigip, evakýatsiialanǵan balalar turatyn oryndy, olardyń tamaqtanýyn uiymdastyrý jáne qaýipsizdigin qamtamasyz etý máselelerimen ainalysady. Sondai-aq, bul jumysqa QR BǴM aýmaqtyq organdary (Túrkistan oblysy jáne Shymkent qalasy Bilim jáne ǵylym salasyn baqylaý departamentteri) qosyldy.
Balalar ornalasqan barlyq uiymdar QR BǴM Bilim jáne ǵylym salasyn baqylaý komitetiniń baqylaýynda. Balalar men ata-analardy izdestirý úshin QR BǴM Bilim jáne ǵylym salasyn baqylaý departamenti, bilim basqarmasy jáne qoǵamdyq uiym ókilderinen turatyn mobildik toptar quryldy» delingen habarlamada.
Belgili bolǵandai, balalar oblys jáne Shymkent qalasynyń bilim berý mekemelerine ornalastyrylǵan. Bilim basqarmasynyń qyzmetkerleri únemi bailanysta jáne saǵat saiyn qalyptasqan jaǵdai týraly baiandap otyrady.
Kóshirý máselelerin úilestirý úshin jedel jeli telefondary qurylǵan: 8-725-33-71-082; 8-725-33-71-313; 8-725-33-71-212; 87014483217 (WhatsApp).
Jergilikti atqarýshy organdardyń derekteri boiynsha, balalar men olardyń ata-analaryn kóshirý Shymkent qalasynda, Túlkibas, Ordabasy, Qazyǵurt, Saryaǵash aýdandarynda júzege asyrylady.
«UBBB derekteri boiynsha Arys qalasynda quramynda 24 201 bala bar 97 bilim berý uiymy (47 mektepke deiingi uiym (4 732 bala); 40 mektep (18 403 oqýshy); 1 otbasy úlgisindegi balalar aýyly (66 bala); 2 kolledj (835 oqýshy); 6 qosymsha bilim berý uiymy, 1 «Kóksarai» qala syrtyndaǵy saýyqtyrý lageri (165 bala (Arys qalasynan ońtústikke qarai 77 km) jumys isteidi.
JAO aqparaty boiynsha qazirgi ýaqytta Shymkent, Túrkistan qalalarynda, Ordabasy, Qazyǵurt, Saryaǵash jáne Shardara aýdandarynda 47 halyqty ornalastyrý ortalyǵy jumys isteidi. Barlyǵy 47 ortalyqta 4 myńnan astam adam bar, onyń ishinde 886 bala.
Jedel áreket etý maqsatynda «BALA QORGAU», «Arysta joǵalǵan balalar» telegramm-chattary jumys isteidi» delingen habarlamada.
Aita keteiik, atalǵan ministrlik qyzmetkerleri Arys qalasynyń balalaryna kómek kórsetýge bir kúndik jalaqysyn aýdarmaq.
