Qazaqstan-Resei shekarasynda fitosanitarlyq baqylaýdyń kúsheitilýi koronavirýsqa qatysty emes. Bul týraly QR Aýyl sharýashylyǵy ministrligi baspasóz qyzmetinen málim etti, dep habarlaidy "Ult aqparat".
«Qazaqstan-Resei shekarasynda fitosanitarlyq baqylaýdyń kúsheitilýi QR AShM men Reseidiń veterinarlyq jáne fitosanitarlyq qadaǵalaý jónindegi federaldyq qyzmetiniń birlesken jumysynyń jalǵasy bolyp otyr. Sondyqtan atalǵan sharalardyń COVID-19 virýsynyń taralý ahýalyna eshqandai qatysy joq», - delingen ministrlik habarlamasynda.
Belgili bolǵandai, Qazaqstan jaǵy tiisti sharalardy ótken jyly qabyldaǵan. RF-men shekara mańynda 32 fitosanitarlyq baqylaý beketi qurylyp, olar elimizge aýyl sharýashylyǵy júkterin kúrgizýde zań buzýshylyqtardy anyqtaýǵa negizdelgen.
2020 jyldyń basynan beri RF aýmaǵynan karantinge jatqyzylǵan ónimdi kirgizý kezinde talaptardy buzýdyń 293 jaǵdaiy anyqtalyp, 10 mln teńge somasyna aiyppul salyndy. Reseidiń veterinarlyq jáne fitosanitarlyq qadaǵalaý jónindegi federaldyq qyzmetine 39 notifikatsiia jiberildi.
Sonymen birge, 2020 jyly Qazaqstan kásipkerleri tarapynan zań buzýshylyqtar anyqtalǵandyǵy týraly notifikatsiialar kelip túspegen.
Júrgizilgen jumys aiasynda, RF úkimeti Veterinarlyq jáne fitosanitarlyq qadaǵalaý jónindegi federaldyq qyzmetke Qazaqstan-Resei shekarasynda fitosanitarlyq baqylaýdy kúsheitý tapsyrmasyn berdi.
«Osy oraida QR Aýyl sharýashylyǵy ministrligi fitosanitarlyq baqylaý aýyl sharýashylyǵy daqyldary ziiankesteriniń enýine jol bermeýge baǵyttalǵanyn túsindirýde. Bul ziiankester ósimdik sharýashylyǵyna zalal keltiredi. Osy turǵyda fitosanitarlyq baqylaýdyń kúsheitilýi COVID-19 virýsynyń taralýy qaýpine esh qatysy joq», - delingen vedomstvo málimetinde.
