Búgin fýtboldan Premer-liga komandalary arasyndaǵy el birinshiliginiń on besinshi týry bastalady, dep habarlaidy "Ult aqparat".
Oiyndar 12 jáne 13 maýsym kúnderine belgilengen. Alǵashqy kúni tórt jup kezdesse, ekinshi kúninde úsh match ótedi.
Atalǵan týrdyń shymyldyǵy 12 maýsymda 18.00-de «Jetisý» (Taldyqorǵan) men «Kaspii» (Aqtaý) komandalary kezdesýimen ashylady. Odan keiin 19.00-de «Aqtóbe» men «Atyraý», 20.00-de «Aqjaiyq» (Oral) men «Ordabasy» (Shymkent), 21.00-de «Shahter» (Qaarǵandy) men «Qyzyljar» (Petropavl) kezdesýlerimen jalǵasady.
Al 13 maýsymda 19.00-de «Taraz» ben «Qairat» (Almaty), «Astana» (Nur-Sultan) men «Tobyl» (Qostanai) oiyndary bolady. Bul týrdy 21.00-de «Qaisar» (Qyzylorda) men «Turan» (Túrkistan) kezdesýi túiindeidi.
Eske salsaq, budan burynǵy on tórtinshi týr 28 jáne 29 mamyr kúnderi oinaldy. Odan keiin ulttyq quramanyń joldastyq kezdesýine orai el birinshiliginde azdaǵan úzilis boldy.
On tórtinshi týrdan keiin 34 upaimen «Astana» kósh bastap keledi. Odan keiingi oryndardaǵy «Tobyldyń» 31, «Qairattyń» 24 upaiy bar.
