Búgin fýtboldan Premer-liga komandalary arasyndaǵy el birinshiliginiń on jetinshi týrynyń alǵashqy oiyn kúni aiaqtaldy, dep habarlaidy "Ult aqparat".
Eske salsaq, buǵan deiin atalǵan týrdaǵy eki oiyn nátijesi belgili boldy. Elordada «Astana» Shymkenttiń «Ordabasy» klýbynan 0:2 esebimen jeńilse, odan keiin Oralda «Aqjaiyq» pen Qaraǵandynyń «Shahteri» 1:1 esebimen teń tústi.
Úshinshi oiynda «Aqtóbe» óz alańynda Petropavldyń «Qyzyljar» komandasyn qabyldady. Atalǵan kezdesýde aldymen petropavldyq komandadan Darko Zorich 68-minýtta esep ashsa, odan keiin 81-minýtta aqtóbelik Iýrii Logvinenko tarazy basyn teńestirdi. Kezdesý 1:1 esebimen teń aiaqtaldy.
Aita keteiik, atalǵan týrdaǵy qalǵan tórt oiyn 23 maýsymda ótkiziledi. Bul kúni «Jetisý» (Taldyqorǵan) men «Atyraý», «Qairat» (Almaty) men «Kaspii» (Aqtaý), «Taraz» ben «Turan» (Túrkistan), «Qaisar» (Qyzylorda) men «Tobyl» (Qostanai) sheberlik baiqasady.
