QR Bas prokýratýrasy apta saiyn baspasóz máslixatyn ótkizip, naqty sala boiynsha atqarylǵan jumystar boiynsha esep beretin bolady, dep xabarlaidy QazAqparat tilshisi.
"Búginnen bastap biz buqaralyq aqparat quraldarymen turaqty túrde kezdesip, qoǵamdaǵy ózekti máseleler boiynsha baiandama jasaityn bolamyz. Bul alań kóptegen máselelerdi xalyqqa jetkizýge kómektesedi dep senemiz. Kelesi baspasóz máslixaty qylmystyq atqarý júiesindegi zańnamanyń saqtalýyna arnalady. Sol sebepti atalǵan taqyryptyń ózektiligine bailanysty barlyq suraqtardy aldyn ala jiberýge bolady. Búginde kóptegen qylmystyq ister ashylyp jatady, jabylyp jatady. Sol sebepti birden jaýap bere almai qalýymyz múmkin. Ondai jaǵdai bolmas úshin suraqtardy press@prokuror.kz mekenjaiyna jiberýdi suraimyz",- dedi Bas prokýratýranyń resmi ókili Oksana Loskýtova.
Aita keteiik, búgingi baspasóz máslixatynda O.Loskýtova jolaýshylardy tasymaldaý salasyndaǵy tekseristerdiń nátijesin jariialady.
Onyń sózine qaraǵanda, avtobýsty mas kúiinde júrgizgen adamdardy jumysqa qaita alý oqiǵalary az emes.
Al Bas prokýratýranyń qoǵamdyq múddeni qorǵaý qyzmetiniń basshysy Azamat Dúisembekov Aqtóbedegi avtobýs órtine qatysty tergeý týraly aityp berdi.
